Бугун деярли барча мамлакатлар, халқаро майдонда кун сайин эътибори ошиб бораётган Ўзбекистон билан ҳамкорликни кучайтиришни ўзлари учун стратегик аҳамиятли масала сифатида кўришмоқда. Ўтган ҳафта бўлиб ўтган Шавкат Мирзиёевнинг АҚШ сафари сарҳисоблари тугаб улгурмасдан, куни кеча Россия Президенти Владимир Путиннинг Ўзбекистонга ташрифи тасдиқлангани эълон қилинди.
Навбатдаги янгилик эса Европа инвестиция банки (ЕИБ) делегацияси билан Ўзбекистонда бўлиб турган Банк вице-президенти Вазил Худакдан келди. ЕИБ билан Ўзбекистон ўртасида 400 миллион долларлик кредит бўйича келишувга эришилганини билдирган Худак, бу кредитлар бўйича шартномалар Шавкат Мирзиёевнинг 2018 йил октябрь ойида Брюсселга, Европа Иттифоқига қиладиган расмий ташрифи доирасида имзоланишини баён қилди.
