29 октябрь куни Наманган вилояти ҳокими Хайрулло Бозоров, хитойлик инвесторлар томонидан ташкил этилиб, вилоятда фаолият олиб бораётган “Namangan Qianxing Invesment” хорижий корхонаси делегациясини қабул қилди. Бу ҳақда вилоят ҳокимлиги ахборот хизмати раҳбари Дилмурод Жумабоев Телеграм каналида хабар берди.
Ўзаро ҳамкорликнинг янги босқичларини белгилаб берган амалий учрашув чоғида Хитой инвестицияларининг вилоят иқтисодиётида улуши тобора ортиб бораётгани қайд этилди.
Хитойлик инвесторлар, бугун Ўзбекистон Чин юрти сармоядорлари учун асосий жозибадор йўналишлардан бирига айланганини таъкидлаб, яқин даврда Ўзбекистон Хитой инвестициялари жалб этиш ҳажми бўйича дунёда иккинчи ўринга чиқиши кутилаётганини қайд этишди. Бу борада Наманган вилоятида хорижий инвесторларга, хусусан хитойлик ҳамкорларга яратилаётган имкониятлар ҳамда шароитларни алоҳида тилга олган меҳмонлар, ҳамкорликнинг янги босқичларга кўтаришга тайёр эканликларини билдиришди.
Наманган шаҳридаги Кўзагарлик кўчасида 4 гектар ер майдонида барпо этилаётган “Меҳмонхона, шоппинг-мол ҳамда кўп қаватли турар-жой комплекси" лойиҳасини амалга ошираётган “Namangan Qianxing Invesment” компанияси вакиллари, лойиҳанинг бориши ҳақида вилоят ҳокимига маълумот беришди. 25 декабрь куни қуриб битказилиши кўзда тутилаётган икки қаватли “Сотиш офиси” очилишида лойиҳанинг тантанали ялпи тақдимотини ўтказиш режалаштирилаётгани билдирилди.
Учрашув давомида Наманган вилоятида амалга оширилиши режалаштирилаётган янги йирик лойиҳалар доирасида ҳамкорлик истиқболлари муҳокама қилинди. “Namangan Qianxing Invesment” раҳбари Хунг Йуи Жен, ҳамкорлари билан бирликда Наманганда Хитой сармоясини жалб этган ҳолда молиявий фонд ташкил этиш истагида эканликларини билдирди. Хайрулло Бозоровнинг вилоятда ташкил этиш юзасидан иш олиб борилаётган Наманган инвестицион банкига улушдор сифатида қўшилиш таклифи, хитойлик инвесторларда катта қизиқиш уйғотди.
Учрашув якунида 78 гектар майдонда барпо этиладиган “Namangan city” халқаро ишбилармонлик маркази, “Юксалиш”массивида 50 гектарлик ҳудудда қад кўтарадиган “Смарт сити” экологик тоза замонавий шаҳарча, Марғилон кўчасида 65 гектар майдонда қуриладиган замонавий турар-жойлар, меҳмонхона ва савдо маркази мажмуаси лойиҳаларида “Namangan Qianxing Invesment” компаниясини иштирокини кўзда тутган ҳамкорлик келишувлари имзоланди.
Меҳмонлар, Наманганни қайтадан бунёд этиш борасида олиб борилаётган кенг кўламли лойиҳаларда ўз иштироклари узоқ муддатли бўлишини ҳисобга олган ҳолда замонавий технологиялар билан ишлайдиган ғишт заводи қуриш режаларини ҳам баён қилдилар. Бу заводни қуриш борасида ҳам вилоят ҳокимлиги ҳамда “Namangan Qianxing Invesment” ўртасида келишув имзоланди.
