Россиянинг Свердловск вилояти губернатори Евгений Куйвашев ноябрь ойида Наманган вилоятига келади. Бу ҳақда Свердловск вилояти Халқаро ва ташқи иқтисодий алоқалар вазирлиги Ташқи иқтисодий ва гуманитар ҳамкорлик департаменти директори Олег Александрин маълум қилди.
Евгений Куйвашевнинг Наманган вилоятига ташрифи давомида кенг кўламли ҳамкорлик шартномалари имзоланиши кутилмоқда. Александриннинг маълум қилишича, ташриф давомида соғлиқни сақлаш, қишлоқ хўжалиги, машинасозлик ҳамда енгил саноат соҳаларида ҳамкорликни янада кучайтириш билан бирга, нефть ва газ соҳасида, саноат секторида ҳам янги ҳамкорлик лойиҳалари бўйича муҳокамалар ўтказилади.
Эслатиб ўтамиз, Наманган ва Свердловск ўртасида ҳамкорлик ўрнатиш бўйича протокол 2017 йил 27 март куни вилоят ҳокими Хайрулло Бозоров бошчилигидаги делегациянинг Свердловск вилоятига расмий ташрифи чоғида имзоланганди.
