Наманган вилоят ҳокимининг биринчи ўринбосари Аюбхон Камалов бошчилигидаги ишбилармон ва тадбиркорлардан иборат Наманган вилояти делегацияси амалий ташриф билан Россия Федерациясининг Свердовск вилоятида бўлиб турибди. Бу ҳақда вилоят ҳокимлиги ахборот хизмати хабар бермоқда.
Ташрифнинг асосий мақсади Наманган вилояти ва Россия вилоятлари ўртасида ҳудудлараро алоқаларни ривожлантириш, маҳсулот етказиб бериш учун янги бозорларга йўл очиш, ҳамкорликда юқори технологияли қўшма корхоналар ташкил этиш, харидоргир маҳсулотлар ишлаб чиқариш ва учинчи мамлакатлар бозорларини ўзлаштиришдан иборат.
Ташрифнинг биринчи кунида Свердовск вилояти маркази – Екатеринбург шаҳрида Наманган вилояти ҳамда Россия Федерациясининг Урал Федерал округи ишбилармонлари иштирокида кенг қамровли учрашув бўлиб ўтди.
Учрашув чоғида ўзаро ҳамкорлик имкониятлари муҳокама қилинди, истиқболли қўшма лойиҳалар юзасидан фикр алмашилди. Наманган вилоятининг иқтисодиёти ва инвестицион салоҳияти ҳақидаги тақдимот россиялик ишбилармонларда катта қизиқиш уйғотди.
Россия Федерациясининг йирик саноат ва табиий ресурслар ҳудуди бўлган Урал Федерал округи ўз ичига Свердловск, Курган, Тюмен ва Челябинск вилоятларини, Ханти-Мантийск ва Ямал-Ненец автоном округларини ўз ичига олади.
