Ватанни севмоқ иймондандир. Ҳар биримиз ҳаётга муҳаббатли, она ватанга садоқатли бўлишлигимиз керак. Бугунги Ватан ҳимоячилари кунида туғилиб ўсган заминига, муқаддас Ватанга содиқ бўлишнинг моҳиятини яна бир қалбларда жонлаштириш тўғри бўларди...
Ватанидан кечган, ўз халқига хиёнат қилганлар, она заминини беш пулга сотганлар охир оқибат хор бўлиб, ўзга элларда сарсон бўлиб қолишининг сонсиз мисоллари бор.
Шулардан бири, Турк футболининг бир пайтлардаги юлдузи Ҳоқон Шукур ҳисобланади. Турк халқининг ўзига бўлган меҳрини, севгисини суистеъмол қилиб, АҚШ махсус хизматлари пинжида бўлган Фетуллаҳ Гюлен раҳнамолигида FETÖ террор ташкилотига аъзо бўлиб кирган Ҳоқон НОШУКУР, 2016 йил 15 июлда Туркияда бўлиб ўтган муваффақиятсиз давлат тўнтаришига уринишдан сўнг АҚШга қочиб кетганди.
Бир неча кун аввал “Welt am Sonntag” газетасига интервью берган собиқ футболчи, ҳаёти муаммолар ичида эканини айтиб, Uber такси тизимида ҳайдовчилик қилаётганини маълум қилган. Қани бир пайтлар бутун Туркия бошида кўтариб юрган Ҳоқон?!
Ватан хоинининг бошига итнинг куни тушади, дейишгани шу бўлса керак-да...
Анвар Икрамов
