Наманган “Ёшлар марказида” Ички ишлар органларининг “Намунали таянч пункти” кўрик-танловининг 2020 йилги вилоят босқичи ғолибларини тақдирлаш маросими бўлиб ўтди. Бу ҳақда вилоят ҳокимлиги ахборот хизмати хабар бермоқда.
Ўзбекистон Президенти Шавкат Мирзиёев раислигида жорий йилнинг 12 февраль куни бўлиб ўтган маҳалла тизимини такомиллаштириш, маҳаллаларда тинчлик-осойишталикни мустаҳкамлаш, жиноятчиликнинг олдини олиш масалалари бўйича видеоселектор йиғилиши, профилактика инспекторлари фаолиятида туб бурилиш ясовчи йиғилиш бўлди.
Давлатимиз раҳбари томонидан таъкидланган "Маҳалла катта ижтимоий куч сифатида майдонга чиқиши керак" деган фикр, бу улкан жараёнда таянч пунктларига, профилактика инспекторларига катта ишонч билдирилганини, шу билан бирга юқори масъулият ҳам юкланганини билдиради.
Бугунги тадбирни очиб берган вилоят ҳокимининг биринчи ўринбосари Аюбхон Камалов юртимиз фаровонлиги ва барча соҳаларда эришилаётган тараққиёт марраларимизнинг асосий кафолати мамлакатимиздаги тинчлик, осудалик эканлигини таъкидлаб ўтди. Вилоят ҳокими ўринбосари, бундан буён профилактика инспекторларига юклатилган ортиқча топшириқлар ҳам кескин қисқартирилиши белгиланганини, маҳаллаларда ҳуқуқбузарликларнинг барвақт олдини олиш бўйича таъсирчан тизимни шакллантириш мақсадида профилактика инспектори кўриб чиқадиган маъмурий ҳуқуқбузарликлар сони оширилишини қайд этиб, Юртбошимиз томонидан профилактика инспекторларига яратилган шароитларни ўрганиб, таянч пунктларининг моддий-техник базасини мустаҳкамлаш вазифаси қўйилганини таъкидлаб ўтди.
Байрамона тарзда ташкил этилган “Намунали таянч пункти” кўрик-танловининг вилоят босқичи ғолиби деб Наманган шаҳри Чаманзор маҳалласига хизмат кўрсатувчи 71-сонли ички ишлар органлари таянч пункти профилактика инспектори, катта лейтенант Низомжон Жумаев ғолиб деб топилди ва республика босқичига йўлланмани қўлга киритди. Иккинчи ва учинчи ўринлар эса Косонсой тумани Ровот маҳалласи профилактика инспектори, лейтенант Низомжонов ҳамда Уйчи тумани Дўстлик маҳалласи профилактика инспектори, капитан Ботиржон Турсуновларга насиб этди.
Шунингдек, бир қатор номинацияларда ҳам ғолиблар аниқланиб, диплом ва қимматбаҳо совғаларга лойиқ кўрилдилар.
Тадбирда санъаткорлар томонидан чиқишлар намойиш этилди.
