25 декабрь куни “Наманган” эркин иқтисодий зонасида Хитой инвестициялари билан ташкил этилган UFA Garments МЧЖ хорижий корхонасининг тамал тоши қўйиш маросими бўлиб ўтди. Тантанали тадбирда вилоят ҳокими Хайрулло Бозоров, хитойлик инвесторлар, ОАВ вакиллари иштирок этдилар. Бу ҳақда вилоят ҳокимлиги ахборот хизмати хабар бермоқда.
Тадбир очилишида сўз олган вилоят ҳокими Хайрулло Бозоров, бир йил аввал ишга туширилган “Наманган” эркин иқтисодий зонасининг ҳудуди бугун 670 гектардан ортганини, бугунги янги корхона билан бирга ҳисоблаганда умумий қиймати 550 миллион АҚШ долларидан ортиқ 15 та йирик лойиҳа амалга оширилаётганини қайд этди.
10 гектарлик майдонда барпо этилаётган эркаклар устки кийимларини ишлаб чиқаришга ихтисослашган ушбу фабриканинг ишга туширилиши натижасида 2500 дан ортиқ иш ўринлари яратилади. 2020 йил 4-чорагида ишга туширилиши режалаштирилаётган ва умумий қиймати 11 миллион долларни ташкил этадиган ушбу корхонада йиллик 2 минг тонна тайёр кийим ишлаб чиқарилади.
Тўғридан тўғри Хитой инвестициялари билан ташкил этиладиган ушбу корхона маҳсулотларининг 70 фоизи Россия ва Европа бозорига экспорт қилиниши кўзда тутилган.
Хитойлик инвестор Фан Чен Сяо хоним ўз сўзида UFA Garments корхонаси 5 йил ичида Наманган вилоятининг энг йирик экспортерига айланишни режалаштираётганини қайд этиб, вилоятда мавжуд арзон хом-ашё ҳамда ёш ва малакали ишчи ресурслари билан Наманганда барпо этилаётган ушбу корхонанинг келажаги муваффақиятли бўлишига ишонч катта эканини таъкидлади.
