21-22 ноябрь кунлари Санкт-Петербург шаҳрида Мустақил Давлатлар ҳамдўстлигига аъзо давлатлар Парламентлараро Ассамблеясининг 50-ялпи мажлиси бўлиб ўтди. Унда Ўзбекистон парламент делегацияси фаол иштирок этди.
Ушбу учрашув доирасида Ассамблеянинг штаб-квартирасида Россия Федерацияси Федерал Мажлисининг Федерация Кенгаши раиси Валентина Матвиенко, Озарбайжон Республикаси Миллий Мажлисининг раиси Оқтай Асадов ва Қозоғистон Республикаси парламенти Спикери Нурлан Нигматуллин билан икки томонлама учрашувлар бўлиб ўтди.
- Парламент делегациялари билан учрашувлар чоғида биз парламентлараро алоқаларни янада мустаҳкамлаш, қонун хужжатларини ишлаб чиқишда тажриба алмашиш ва ўзаро ҳамжиҳатлик билан ҳукуматлараро битимларни амалга ошириш масалаларини муҳокама қилдик, - дейди Олий Мажлис Сенати раиси Танзила Нарбаева
Тадбирнинг иккинчи кунида Ассамблеянинг доимий комиссиялари томонидан тайёрланган 11 та модел қонун ҳужжатлари қабул қилинди. Улар Қонун лойиҳаларини ишлаб чиқишда фойдаланиш учун Ассамблеяга аъзо давлатлар парламентлари юборилади. Шунингдек, ялпи мажлисда модел қонун ижодкорлигининг 2020-2022 йилларга мўлжалланган режаси қабул қилинди.
Парламентлараро Ассамблеянинг ялпи мажлиси қарорлари Ўзбекистон парламенти ва МДҲ Парламентлараро Иттифоқининг бошқа аъзо мамлакатлари ўртасидаги ҳамкорликни янада ривожлантириш ва самарадорлигини оширишда муҳим қадам бўлади.
