“Пахтакор” жамоаси бош мураббийи Шота Арвеладзе Туркиянинг афсонавий жамоаларидан бири - Измирнинг “Гўзтепа” (Göztepe) клуби бош мураббийлигига ўтиши мумкин. Бу ҳақда Турк матбуоти “Göztepe” клубидаги манбаларига асосланиб хабар берди.
Туркиянинг Spor Toto Супер Лигасида муваффақиятсиз иштирок этаётган сариқ-қизиллилар мураббийи Тамер Туна истеъфога чиқарилгач, клуб президенти Меҳмет Сепил Шотага жамоа бош мураббийлиги таклифи билан чиқди. Декабрь ойида “Пахтакор” жамоаси билан шартномаси якунланадиган Арвеладзенинг ўзида ҳам Туркия футболига қайтиш истаги борлиги бу таклифни қабул қилишида асосий омил бўлиши кутилмоқда дейди клуб манбаси. Мабодо Шота Арвеладзе бу таклифни рад этса, Б вариант сифатида турк мураббий Айкут Кожаманнинг “Göztepe” клубига устозлик қилиши режалаштирилмоқда.
