2016 йил,Тошкент, тун. Путинга Эрдоғандан махфий мактуб келганди...

 
2015 йил 24 ноябрда Россия Су-24 ҳарбий самолёти Туркиянинг F-16 қирувчиси томонидан хатолик сабаб уриб туширилганини, бу воқеа икки мамлакат ўртасида муносабатларни маълум муддат таранглаштиргани эсимизда...
Куни кеча Туркиядаги Йилдирим Боязид Университетида бўлиб ўтган “Туркия-Россия муносабатлари: Келажакни шакллантириш” мавзусидаги мулоқотда иштирок этган Туркия Президенти матбуот хизмати раҳбари Ибраҳим Калин, сўнгги йиллардаги Туркия-Россия муносабатлари ҳақида кенг фикр юритди. Су-24 ҳарбий самолётининг уриб туширилиши воқеаси билан боғлиқ тўхталиб ўтган Ибраҳим Калин қуйидагиларни баён қилди:
 
“Бир кун балки тафсилотларини ҳам айтиб бераман. Бир кун тунда Ўзбекистонга учиб бориб, муҳтарам Путинга муҳтарам президентимизнинг мактубини етказганимизнинг барча тафсилотларини мен биламан. Бир кун айтиб берармиз иншооллоҳ. Лекин шуни айтаманки, биз ўша онларда фақат яхши ниятда бўлдик. Мана, бунинг натижаларини ҳам кўрдик, ҳамдлар бўлсин”.
 
Россия президенти Владимир Путин номига Туркия президенти Режеп Таййип Эрдоған номидан Россия ҳарбий самолётининг уриб туширилиши туфайли келиб чиққан низоли вазиятни бартараф этиш истаги билдирилган мактуб 2016 йил июнь охирида эълон қилинганини, ва Путиннинг Шанхай ҳамкорлик ташкилоти Давлат раҳбарлари кенгашининг мажлисида иштирок этиш учун 2016 йил 23-24 июнь кунлари Тошкентда бўлганини ҳисобга олсак, Туркия ва Россия муносабатларидаги тарангликни йўқотиб, икки мамлакатни қайта яраштирган мактуб, айнан Туркия Президенти матбуот хизмати раҳбари айтган мактуб экани ва Путинга Тошкентда берилгани маълум бўлади...

Биз Twitterда