Иорданияда Ғарбий Осиё минтақаси учун стол тенниси бўйича Токио Олимпиадасига йўлланма берувчи турнир бўлиб ўтди. Эътиборлиси, ушбу мусобақа инсоният учун Олимпия ўйинларига йўлланма олган энг ёш атлетлардан бирини аниқлаб берди.
2009 йил 1 январь куни Сурияда туғилган Хенд Заза Иорданиядаги турнир ғолиби бўлиб, Токио-2020 Олимпия ўйинлари иштирокчисига айланди. Стол тенниси ёш чегараланмайдиган спорт турларидан бири. Заза эса Сурияда ички низолар бошланаётган пайт дунёга келган бўлса, бугунга келиб, уруш ўчоғидан чиққан 11 ёшли Олимпиадачи бўлди.
Шу тариқа Токио-2020 да сайёрамиз аҳли энг ёш атлетлардан бирининг чиқишига гувоҳ бўлиши мумкин. Бу борада рекорд кўрсаткич грециялик Димитриос Лундрасга тегишли. Ушбу юнон спортчиси 1896 йил Афинада ўтказилган илк Олимпия ўйинларида иштирок этганида эндигина 10 ёш 218 кунлик бўлган. Аҳамиятлиси, Лундрас Афинада жамоавий брус машқида бронза медалини ҳам қўлга киритган. Шунингдек, 1968 йил Франциянинг Гренобль мезбонлигида ўтган қишки Олимпия ўйинларида 11 ёшли руминиялик Беатрис Хустю фигурали учиш бўйича иштирок этган.
Яни бир жиҳати, Токио бу йил Олимпиадалар тарихидаги энг ёши катта спортчини ҳам қабул қилиши мумкин. Айни пайтда япониялик чавандоз Хироси Хокецу ўз юртида ўтадиган Олимпия ўйинларида қатнашиш учун тайёргарлик кўрмоқда. Хокецу 1941 йил 28 март куни туғилган. 78 ёшли ушбу атлет фаолияти давомида Токио-1964, Сеул-1988, Пекин-2008 ва Лондон-2012 Олимпиадаларида қатнашган.
Ҳозирча эса швециялик мерган Оскан Гван шу пайтгача Олимпия ўйинларида иштирок этган энг ёши улуғ спортчи бўлиб турибди. Гван 1920 йил 72 ёшида Антверпен Олимпиадасида қатнашибгина қолмай, кумуш медалга ҳам сазовор бўлган эди.
