ҲЕЧ КИМ ХАВФДАН ҲОЛИ БЎЛОЛМАЙДИ...
...токи карантин қоидаларига қатъий амал қилмас эканмиз!
...токи карантин қоидаларига қатъий амал қилмас эканмиз!
Бугунги таҳликали кунлар нафақат инсон сабру қаноатини, балки виждон ва иймонини ҳам синовдан ўтказаётгандай. Бундай дейишимнинг сабаби бор. Ўзи ва оиласи, яқинлари, халқи саломатлигини ўйлаган, бунинг учун қайғурмоқликни фуқаролик бурчи деб ҳисоблаган инсон борки, айни дамда ҳукуматимиз, Президентимиз, соғлиқни сақлаш ҳамда бошқа тегишли ташкилотлар томонидан белгилаб қўйилаётган қоида ва тартибларга қатъий риоя қилмоқда. Аммо юртдошларимиз орасида шундай кимсалар ҳам учраб турибдики, уларнинг хатти-ҳаракатини кўриб, шунчалар ҳам ақлсизлик, беписандлик, бепарволик, калтаўйлик бўладими, деб юборасан беихтиёр.
Мамлакатимизда карантин тартиби жорий этилганига ўн беш кундан ошди. Ҳар куни, ҳар соатда юртимиздаги эпидемиологик вазият ҳақида оммавий ахборот воситаларида, ижтимоий тармоқларда очиқ ва тўлиқ хабарлар бериб бориляпти. Тўғри, шифокорларнинг саъй-ҳаракати туфайли касалликни енгаётганлар ҳам бор. Аммо афсуски, коронавирус инфекциясини юқтириб олганлар сони кун сайин ортиб бораяпти. Наҳот, шунинг ўзи хавфнинг оқибатини тасаввур этиш учун етарли бўлмаса?!
Кеча хизмат юзасидан Наманган шаҳридаги бир маҳаллада бўлдик. Тор кўчаларда уч-тўртта бўлволиб суҳбатлашиб ўтирган ёши олтмишлардан ошган эркакларни кўриб, очиғи, жаҳлим чиқди. Улар иякларига дока ниқобни шунчаки илиб олишган, ҳеч нарсадан бехабар, гўёки дунё тинч, олам хавотирда эмас, ҳеч кимга давосиз ва юқумли касаллик чанг солмаётгандек, бемалол гурунглашиб ўтиришибди. Бундай қилишлари нотўғри эканини тушунтирсангиз, уйда зерикишганини айтишади уялмай!
Англадимки, бундай таҳликали кунлар кимнинг кимлигини аён этиб қўймоқда. Шундай оилаларни кўряпмиз, ўн-ўн беш кунда бир озиқ-овқат, дори-дармон учунгина кўчага чиқишяпти. Қолган пайт уйда, томорқасида фойдали машғулот билан банд бўлмоқда. Томорқаси ярим сотих бўлган хонадонни биламан. Бу ҳовлида саккиз жон яшайди. Қўлидан иш келадиганлар тўрт нафар. Бу оила мана шу ярим сотих ерда кўкатлар ва хонаки гуллар етиштиради. Албатта, даромад манбаи фақатгина шу эмас. Аммо бу оиланинг касбдан ташқари шуғулланадиган машғулоти бор. Шу билан бирга оила аъзоларининг тушунчаси кенг, маданияти, маънавияти бор.
Бир неча кун аввал вилоят юқумли касалликлар шифохонасида карантинда бўлган бир инсон кўнглидан кечаётган ўйлари ҳақида сўзлаб қолди. Инсоннинг давосиз дард чангалида эканини ҳис қилишининг ўзиёқ даҳшатли. Касалхона дарвозасидан кираётганингизда, бу ердан тирик чиқиб кетиш насиб этармикан, деган ўйни хаёлингиздан ўтишининг ўзи оғир. Иситма оташида ёнаётган, тўйиб нафас олиш дунёдаги энг олий бахт ва бебаҳо неъмат эканини бу балонинг чангалига тушганингизда юракдан ҳис этасиз. Аммо унда кеч бўлиши мумкин. Беморлар орасида ҳатто болаларнинг ҳам борлиги – катталарнинг хатоси, бепарволиги оқибатидир.
Бугун зериккангиздан кўчага чиқасиз, ўзингизга ўхшаган бекорчилар билан юзма-юз туриб бўлмағур гапларни гаплашасиз. Кеча ё бир неча кун аввал уларнинг қай бири қаерларда бўлгани, кимлар билан мулоқотда бўлганини билмайсиз. Гўёки сизга касаллик ҳеч қачон юқмайди, ён-атрофингизда ҳам инфекцияни юқтирганлар йўқлигига ишончингиз комил. Хуллас, суҳбатдошларингиз атрофга аланглаб, ниқоби нафасини қайтараётганини айтиб, уни бўйнига тушириб олади. Сиз парво қилмайсиз. Бир-икки соатлик гурунгдан кейин уйингизга кирасиз. Ўғлингиз, қизингиз ёхуд набирангиз югуриб келиб бўйнингизга осилади. Сиз ҳам уни эркалаб ўпасиз... Бир неча кундан кейин аввал норасидангизнинг, кейин сизнинг иситмангиз чиқа бошлайди...
Ойнаи жаҳонда хорижий давлатларда кўча-кўйларда нафаси бўғилганидан жон таслим қилаётган кишиларни кўрмадингизми? Уларнинг ақли сизникичалик эмасмиди? Улар ўзини эҳтиёт қила билмасмиди? Касалликнинг оқибати ҳақида эшитмаган эдими? Улар ҳам инсон эди, улар учун ҳам умр, ҳаёт азиз эди. Аммо улар лаҳзаларни бой беришган эди, эртароқ касалликдан сақланиш чораларини кўришмаган эди. Кўзга кўринмас вируснинг нималарга қодир эканини тасаввур қилишмаган эди. Худди сиз каби...
Кўзингизни очинг, азиз ҳамюртим. Сизнинг ҳаётингиз биз учун қадрли. Коронавирус қурбони ёхуд унинг тарқатувчиси бўлиб қолманг. Ўзингизни эҳтиёт қилинг. Уйдан чиқманг. Оила аъзоларингизни ҳам уйда қолишларини таъминланг. Нимадан қийналсангиз, бу ҳақда телефон орқали маҳаллангиз ва тегишли идораларга маълум қилинг. Бугун барча чоралар сизнинг – халқимизнинг саломатлигини асраш, пандемиядан эсон-омон, йўқотишларсиз олиб ўтишга қаратилган. Кўриб турибсиз, ҳукуматимиз бу мақсад учун ҳеч нимани аямаяпти. Фақат биз уйда қолиб, карантин қоидаларига сўзсиз амал қилсаккина, бу чоралар ўз самарасини беради. Шуни унутмайлик!
Кўзингизни очинг, азиз ҳамюртим. Сизнинг ҳаётингиз биз учун қадрли. Коронавирус қурбони ёхуд унинг тарқатувчиси бўлиб қолманг. Ўзингизни эҳтиёт қилинг. Уйдан чиқманг. Оила аъзоларингизни ҳам уйда қолишларини таъминланг. Нимадан қийналсангиз, бу ҳақда телефон орқали маҳаллангиз ва тегишли идораларга маълум қилинг. Бугун барча чоралар сизнинг – халқимизнинг саломатлигини асраш, пандемиядан эсон-омон, йўқотишларсиз олиб ўтишга қаратилган. Кўриб турибсиз, ҳукуматимиз бу мақсад учун ҳеч нимани аямаяпти. Фақат биз уйда қолиб, карантин қоидаларига сўзсиз амал қилсаккина, бу чоралар ўз самарасини беради. Шуни унутмайлик!
Аҳмаджон АЛАХОДЖАЕВ,
Халқ депутатлари вилоят Кенгаши депутати.
Халқ депутатлари вилоят Кенгаши депутати.
