Германиянинг «Transfermarkt» нашри Ўзбекистон супер лигаси жамоаларининг янги трансфер баҳоларини эълон қилди. Манбада футбол клубларининг футболчилари сони ва баҳосига қараб умумий таркиб нархи келтирилган. Шунингдек, жамоа футболчиларнинг ўртача трансфер баҳоси ва ёши ҳам ёзилган.
Наманганнинг «Навбаҳор» жамоаси Ўзбекистоннинг энг қиммат клублари кучли учлигидан жой олди. Жамоасининг нархи 7,5 миллион еврони ташкил этади. Таркибида 30 нафар футболчини жамлаган клубнинг ҳар бир футболчиси ўртача 250 минг евродан нархланган.
«Transfermarkt» нашрига кўра, Осиё чемпионлар лигаси иштирокчиси саналмиш Тошкентнинг «Пахтакор» клуби айни дамда Ўзбекистоннинг энг қиммат таркибга эга жамоасига айланган.
Клубнинг умумий нархи 15,08 миллион еврони ташкил этади. Бунда ҳар бир футболчининг ўртача баҳоси 580 минг еврога баҳоланган.
Бу борада иккинчи ўринни «Локомотив» клуби эгаллаб турибди. «Темирйўлчилар»нинг умумий трансфер баҳоси 9 миллион еврога тенг. Жамоа ўйинчиларининг ўртача нархи 360 минг еврога баҳоланган.
Энг қиммат таркиб борасидаги бешликдан Тошкентнинг «Бунёдкор» ҳамда Олмалиқнинг ОКМК клублари ҳам жой олган бўлиб, Вадим Абрамов жамоаси 6,8 миллионга, Миржалол Қосимов бошқарувидаги клуб эса 6,55 миллион еврога баҳоланган.
