Euromonitor тадқиқот ташкилоти мутахассислари дунёнинг сайёҳлар энг кўп ташриф буюрадиган шаҳарлари рўйхатини эълон қилишди.
Бу рўйхатнинг биринчи поғонасидан Гонконг жой олди. 2016 йил давомида ушбу шаҳарга 27 миллиондан ортиқ жаҳоннинг турли мамлакатлари фуқаролари ташриф буюришган. Таҳлилчилар асосий ташрифчилар дея хитойликларни эътироф этишаётгани бежизга эмас. Чунки, Британия империясининг собиқ мустамлакасига бўлган қизиқиш хитойликларда жуда катта. Чунки, яқин-яқингача чинликлар Гонконгга оммавий киришдан маҳрум эдилар. Бундай имконият пайдо бўлиши уларнинг ташрифини кўпайтириб, Гонконгни энг талабгор шаҳарга айлантирди.
Рейтингнинг иккинчи ўрнида Бангкок жойлашган. Таиланд пойхтахтига 18,7 миллион саёҳатчи келган. Кучли учликни эса Лондон, 18,6 миллион сайёҳ билан якунлаб берган.
Бундан ташқари кучли ўнликдан Сингапур ва Макао, Дубай ва Париж, Нью-Йорк ва Куала-Лумпур, шунингдек Истанбул шаҳарлари ўрин олишган.
Самарқанд шаҳрининг ҳам сайёҳ ташрифи юқори бўлган шаҳарлар қаторидан ўрин олгани албатта бизни қувонтирмай қўймайди. Лекин ҳали олдинга чиқиб олиш учун анча тер тўкиш керак. Сўнгги пайтларда ҳукуматимиз томонидан туризм соҳасини ривожлантириш учун жиддий эътибор қаратилмоқда. Албатта бу юртимизга сайёҳлар оқимининг ошишига хизмат қилади. Агар қабул қилинаётган ҳужжатларда белгиланган вазифалар ўз вақтида амалга оширилса, бизнинг шаҳарларимиз ҳам бемалол жаҳоннинг энг талабгор сайёҳлик масканлари кучли ўнлигини забт эта олади.
