“Навбаҳор” жамоаси ҳақида то чемпионат бошлангунга қадар турли гап-сўзлар пайдо бўлгани сир эмас. Наманган клуби россиялик инвесторлар назарига тушгани, уларнинг озгина эътибори “Навбаҳор”ни мунтазам равишда мамлакат чемпиони бўлишига етиши ҳақида кўп ёзилди.
Дарҳақиқат чемпионлик нашидасини сурганига 20 йилдан ошган “Навбаҳор” ўтган йили бу юбилей санани ажойиб тарзда нишонлаб, 1996 йилги чемпион бўлган футболчиларни Наманганга таклиф этди. Қаранг, жуда ажойиб! Жамоа чемпион бўлганлигининг 20 йиллигини нишонламоқда. Бу бир томондан бироз кулгули бўлсада, лекин ўша ўтмиш афсоналари, ўша юлдузларни кўрган ишқибозлар, клубнинг юлдузли онларни эслашди. Бундай учрашувдан бошлари осмонга етди.
Транспорт соҳаси асосий ҳомийси бўлган пайтларда “автомобилчи”, “облводхоз” қарамоғида юлдузли онларни ўтгазган пайтларда “сувчи” бўлаёзган “Навбаҳор”ни сўнгги пайтларда “Лочинлар” деб аташ урфга кирди. Лекин шу “лочинлар” ўтган мавсумда шу қадар “пастлаб учишдики”, “тумшуқлари”ни ерга уриб олишларига оз қолди. Сал бўлса “ҳалокат”га учрашлари аниқ эди. Янги мавсумда жамоада яқин ўтмишнинг бир эмас икки “супер ҳужумчи”лари биргаликда иш бошлагани клубга соф ҳаво олиб келди. Сўзимизга уларнинг кеча Самарқандда “Динамо” устидан 10 киши бўлиб, ғалаба қозонганликлари исбот бўла олади.
2017 йилги мавсумни кетма-кет уч ғалаба билан бошлаб, ҳали ўз дарвозасидан тўп олиб чиқмаган “динамо”чилар нега “Навбаҳор” қаршилигини синдира олмадилар? Ўтган йилги Англия премьер-лигасида қаҳрамонлик кўрсатган “Лестер”га қиёсланаётган жамоага қарши наманганликларни ўта иштиёқ билан тўп суришганининг сабаби нимада? Кўпчиликни шу савол қизиқтираётгани табиий.
Бизга, бугун аён бўлган, лекин расмий тасдиғини топмаган маълумотларга кўра, “Навбаҳор”нинг “Самарқанд”даги ўйинини клубга анчадан бери қизиқиш билдираётган россиялик сармоядорлар кузатишган. Агар улар жамоанинг ўз қўлларига оладиган бўлишса, “Навбаҳор” ва Лондоннинг “Арсенал” жамоаси ўртасида ҳамкорлик ўрнатилиши тўғрисида ҳам хабарлар мавжуд. Агар жамоа шу шиддатда ўйинда давом этадиган бўлса, бу йил наманганликлар совринли ўринларга бемалол даъвогарлик қила олишади.
Сарвар ХОН.
