Ўзбекистон матуботи билан ҳамкорлик истиқболларини ўрганиш учун юртимизда бўлиб турган Германиянинг йирик халқаро телерадиокомпанияси – Deutsche Welle вакиллари Наманган шаҳрида бўлиб қайтишди.
Германия иқтисодий ҳамкорлик ва тараққиёт вазирлиги томонидан ажратилиши кўзда тутилаётган грант маблағлари ҳисобига Ўзбекистонда журналистика ривожи учун фойдали бўладиган лойиҳалар ишлаб чиқиш учун бу сафарнинг самарали бўлиши кутилмоқда.
Ўзбекистонда матбуотнинг бугунги ҳолати билан танишиш, таҳририятлар фаолиятини бевосита суҳбатлар орқали таҳлил қилиш, бунинг натижасида эса келгуси ўтказилиши режалаштирилаётган тренинглар ва семинарларнинг мавзусини аниқ ишлаб чиқишни мақсад қилган ҳолда, Deutsche Welle вакиллари Люда Ранерт ва Витаут Рудник Намангандаги “Матбуот уйи”га ташриф буюришди.
Вилоятдаги босма ва электрон ОАВ муҳаррирлари билан бўлиб ўтган учрашув чоғида, таҳририятларнинг фаолияти билан танишишди. Муҳаррирлар ўзлари учун қизиқарли бўлиши мумкин бўлган лойиҳалар бўйича фикрларини ўртага ташлашди.
Маҳаллий редакторлар, қизиқарли ўтган мулоқотда келгусида медиа-менежмент ва интернет ОАВ учун материал тайёрлаш каби мавзуларда тренинглар фойдали бўлиши ҳақида умумий фикр билдирдилар.
Люда Ранерт ва Витаут Рудникнинг она ватанлари бўлган Германия ва Белоруснинг матбуоти ва журналистикаси бўйича меҳмонларга берилган қатор саволлар бўйича батафсил маълумотлар олинди.
