Буюк Туркиянинг Буюк Президенти: Халқ сайловда Эрдоғанга ўзининг тўла ишончини баён этди

 
Кеча Туркияда мамлакат президентлиги ҳамда Туркия Буюк Миллат Мажлиси сайловлари бўлиб ўтди.
Туркия Президенти сайловида AK Parti (Адолат ва тараққиёт партияси) вакили сифатида Туркиянинг амалдаги президенти Режеп Таййип Эрдоған, Жумҳурият халқ партиясидан (CHP) Муҳаррем Инже, янги ташкил топган İYİ Partiнинг раиси Мерал Акшенер, асосий аъзолари курдларнинг иборат бўлган HDP (Халқларнинг демократик партияси)нинг озодликдан маҳрум этилган раиси Селаҳаттин Демирташ, Saadet (Саодат) партияси раҳбари Темел Карамоллаоғлу ва Vatan (Ватан) партияси раиси Доғу Перинчек иштирок этдилар.
Сайлов эълон қилинган кундан бери турли хорижий ОАВ, Туркиядаги мухолифат томонидаги нашрлар сайловнинг биринчи турида ҳеч ким ғалаба қозона олмаслигини, асосий кураш иккинчи турда бўлишини “башорат” қилишга ўтгандилар. Бироқ Туркия халқи, ўзининг буюк келажагини, Буюк Туркияни Эрдоғансиз тасаввур қила олмаслигини сайловда баён этди: Режеп Таййип Эрдоған 52,5 фоиз овоз билан сайловнинг биринчи туридаёқ ғолиб чиқди.
Эрдоған, 2017 йили президентлик бошқарув тизимига ўтилгандан сўнг, ялпи сайлов билан сайланган Туркиянинг биринчи президенти бўлди.
Сайловда Муҳаррем Инже 30,6 фоиз, қолган номзодлар – Селаҳаттин Демирташ 8,3 фоиз, Мерал Акшенер 7,3 фоиз, Темел Карамоллаоғлу 0,8 фоиз ва Доғу Перинчек 0,2 фоиз овоз тўплагани эълон қилинди.
Режеп Таййип Эрдоғаннинг Адолат ва тараққиёт партиясининг (AK Parti), MHP (Milliyetçi Hareket Partisi – Миллатпарварлик ҳаракати партияси) билан ташкил этган Жумҳуриттифоқ коалицияси эса Туркия Буюк Миллат Мажлиси сайловларида 53,6 фоиз овоз билан Мажлисда кўпчилик ўринни ўзига кафолатлади.
Жумҳурият халқ партияси, İYİ Parti ва Saadet партияси томонидан тузилган Миллат Иттифоқи коалицияси эса 34 фоиз овоз билан Мажлисга кирди.
Халқларнинг демократик партияси 11,6 фоиз овоз олган ҳолда, 10 фоизлик минимумни ошган ҳолда, Буюк Миллат Мажлисида 67 та депутат курсисига эга бўлди.
Сайловларда Режеп Таййип Эрдоғаннинг ҳамда Адолат ва тараққиёт партиясининг ишончли ғалабаси бу – Туркиянинг ички ва ташқи сиёсатида танланган йўлнинг яна давом этиши демакдир. Бу жиҳатдан сўнгги йилларда Туркий давлатлар билан, хусусан Ўзбекистон билан кенг дўстлик ва ҳамкорлик сиёсатини қўллаб-қувватлаётган Туркия, бундан кейин ҳам бу борада одимларини кенгайтириши шубҳасиз. Қолаверса, дунёда Исломнинг ҳамда Туркийликнинг тобора баланд янграётган овози бўлиб бораётган Туркия, навбатдаги 5 йилда бу нуқтаи назардан ҳам янги чўққиларни забт этишига, дунёнинг 5 давлатдан иборат эмаслигини (БМТ Хавфсизлик кенгашининг 5 доимий аъзоси) жаҳон ҳамжамияти томонидан тўла қабул эттиришга эришишига ҳамда Бирлашган Миллатлар Ташкилотида Туркий ва Ислом давлатларининг бирлашган иродасига айланишига ишонч ортди.
Ўзбекистон Президенти Шавкат Мирзиёев, биринчилардан бўлиб Режеп Таййип Эрдоғанни Туркия Жумҳурияти Президенти сайловларидаги ғалабаси билан қутлади ва табрик мактубини йўллади. 

Биз Twitterда