Ўтган йили “Лестер” билан Англия Премьер-лигасида чемпионликка эришган Клаудио Раньери жамоанинг бу йилги мавсумдаги муваффақиятсиз юришларидан сўнг, (25 турдан сўнг хавфли зонага тушиб қолганди) истеъфога чиқишга мажбур бўлди. Унинг клуб тарихидаги ўрни ҳеч қачон инкор этилмаслиги тайин, бироқ ниманидир ўзгартиш кераклигини “Лестер” мутасаддилари ҳам, Раньерининг ўзи ҳам тушуниб етишгач, бу умумий қарор эълон қилинди.
Клаудионинг ёрдамчиси Крейг Шекспирнинг истеъфодан сўнг икки ўйинда икки ғалабага эришгани (“Ливерпуль” ва “Халл сити” устидан) унга мавсум якунига қадар бош мураббийлик шартномасини олиб келди.
2017 йилда Ранъери истеъфосига қадар ғалаба у ёқда турсин, ҳаттоки бирорта тўп ҳам киритолмаган “тулкилар”нинг бу зафарлари жамоада руҳий муҳит яна яхшиланганини, жамоа аъзолари стресс ҳолатидан чиқиб улгурганларини кўрсатмоқда. Эркин ҳаракатланган “Лестер” нималарга қодир эканини ўтган мавсумда кўр бор кўрганмиз.
Бу кеча Чемпионлар лигаси нимчорак финали жавоб учрашувида Лестерда, “Кинг Пауэр” ўйингоҳида “Севилья”ни қабул қилади. Биринчи учрашувда 1:2 ҳисобида мағлуб бўлган “Лестер” ўз майдонида Андалузия жамоасини енга олишига кўпчилик ишонқирамаяпти. Ҳаттоки букмекерлик идоралари испан жамоасининг ғалабасини тахмин қилишмоқда ва шунга яраша коэффициент белгилашмоқда.
Аммо Vodiymedia башорати уларникидан анча фарқ қилади: бу кеча Европа Шекспирни тан олади ва “Лестер”нинг Европа эртаги давом этади. Бунга қуйидагиларни омил қилиб кўрсатиш мумкин:
- Ўзини Раньери ёрдамчиси эмас, мустақил мураббий сифатида Европада танилишини хоҳлаган Шекспир;
- Хавфли зонадан чиқиб кетгач, руҳий ҳолати яхшиланган футболчилар;
- Мағлуб бўлган тақдирда “Лестер”га бўладиган босимнинг мағлубият ҳолатида “Севилья”га нисбатан танқиддан камроқ бўлиши ва буни ҳар икки жамоа ҳам яхши тушуниши;
- “Лестер”да бу мавсум охирги эканини яхши англаб турган юлдузлар ва уларга ўзлари ҳақда Европага яна бир бор эслатиб қўйишга имконияти;
- Албаттаки, ВАРДИ!
“Лестер”-“Севилья” (биринчи ўйин 1:2)
Лестер, “Кинг Пауэр” ўйингоҳи
00:45 (Тошкент вақти билан)
Ҳакам: Орсато (Италия)
Vodiymedia башорати: 3:1
