Ички ишлар вазирлигига: "Рэкет" қайтдими? – Наманган туманида ички ишлардан ҳайдалган ходимнинг кирдикорлари ҳақида

 
Таҳририятимизга хат келди. Наманган туманида яшовчи фуқаронинг ёзган мурожаатини ўқиб, 21 асрда Ўзбекистонда бундай сурбетлик ҳали ҳануз воқеъ эканидан таажжубга тушдик. Хатни мутасадди ташкилотлар эътиборига ҳавола қилган ҳолда, ўзгаришларсиз, таҳрирсиз эълон қилишга қарор қилдик.
 
“Мен, Тожибаев Алижон Маматвалиевич, Наманган туман Тепақиёт қишлоғида яшайман. Аввал тумандаги Қ.Солиев номидаги жамоа хўжалигида ишлаганман. 1995 йилдан бери қишлоқ ҳудудидаги 1,8 гектар майдонда боғдорчилик фаолияти билан шуғулланиб келаман.
Боғдорчилик хўжалигимиз ёнида Куюк мозор зиёратгоҳи жойлашган. Бу йил ҳамқишлоғимиз, собиқ ички ишлар идораси ходими Назаров Тўлқинжон Махамадалиевич бу зиёратгоҳнинг бир қисми ҳамда бизнинг боғнинг катта қисмини ўз ичига оладиган болалар боғчаси қуриш лойиҳасини кўтариб чиққан ва туман миқёсида қонун талабларига мос бўлмаган шаклда, Маҳалла фуқаролар йиғинининг розилигисиз қуришга рухсатнома олганди. Аммо қишлоқ аҳлининг ёппасига кескин қаршилиги, маҳаллий аҳоли учун ўта маънавий қадрият ҳисобланган зиёратгоҳ ҳудудида бошқа бино қурилишини истамагани натижасида бу қарор бекор қилинганди.
Тўлқинжон Назаров бу масалада мени ва оиламни шахсан сабабчи билиб, бизга қарши ўч олишга киришди. Қолаверса, боғча қурилиши бекор бўлгач, “ҳали сенлар билан бошқача гаплашаман, ҳаётингни муаммога айлантираман, олдимга ялиниб келасан” деган туман ҳокимининг ўринбосари Ҳабибулло Ўринов билан шерикликда турли йўллар билан бизга муаммо туғдиришни йўлларини қидиришга бошлади. Боғдорчилик хўжалиги ҳудудида Қ.Солиев номидаги жамоа хўжалигига тегишли бўлган, кейинчалик бепул шаклда Наманган туман бош пиллахонаси МЧЖ ихтиёрига ўтказилган инкубация биноси бор. Мен аввал бу МЧЖда ҳам фаолият олиб борганман. Қолиб кетган иш ҳақларим ҳисобига МЧЖнинг ўша пайтдаги раҳбари томонидан бу бинони менинг номимга расмийлаштириб берилиши айтилганди. Ўз ҳисобимдан бу ерга қўшимча бостирма, дарвозахона қурганман. бинодан мева инкубацияси сифатида фойдаланиб келаман. Қолаверса, мавсум давомида дам олиш ва вақтинча яшаб туриш учун фойдаланаман. Тўлқинжон Назаров Наманган туман бош пиллахонаси МЧЖ билан бу бино борасида яширин келишувга эришиб, 2018 йил 26 апрель санаси билан имзоланган олди-сотди шартномасига асосан, бинони 3 (уч) миллион сўмга сотиб олибди. “Elit Rieltor Savdo” МЧЖ воситачилигида имзоланган бу шартнома ҳамда иловасидаги топшириш ва қабул қилиш далолатномасида ҳеч қандай эътирозлар йўқлигини белгиланибди.
Бир неча кун аввал мен билан алоқага чиққан Тўлқинжон Назаров, агар зудлик билан унга 7200 (етти минг икки юз) АҚШ доллари бериб, ундан бинони сотиб олмасам, ички ишлар идоралари ходимлари билан келиб, куч ишлатган ҳолда мени кўчага чиқариб юборишини маълум қилди. 2015 йилда ички ишлар ходими сифатида фаолият олиб бораётганда прокуратура томонидан 2015 йил 12 августда Ўзбекистон Республикасининг Жиноят кодекси 28- ҳамда 211-моддалари билан жиноий иш қўзғатилган, бироқ кейин қандайдир йўллар билан қамоқдан қутулиб қолган бу фуқаро, ўзининг ички ишлар органидан кетгани билан ҳали ҳам давлатнинг одами эканини, бу туманда унинг устидан бирор жойга шикоят қилиш фойдасиз эканини, истаганини қилишга қодир эканини айтмоқда.
Даставал, масалани тинчлик йўли билан ҳал қилишга уриндим. “Майли, агар сизга ўтган бўлса ва Сиздан сотиб олишдан бошқа йўлим йўқ бўлса, машинамни сотиб, пулингизни топшираман” дедим. Мақсадим, қонуний йўл билан тегишли органларга шикоят қилиш ва масалани қонуний ҳал этилишига эришиш учун бироз вақт ютиш эди. Бироқ, Тўлқинжон Назаров менга қайта телефон қилиб, “машинангизга ўзим харидор олиб бораман. Мен Сизнинг пул тайёрлашингизни кутолмайман. Агар бугун соат 17:00 гача пулимни қилиб бермасангиз, бино нархига 500 (беш юз) АҚШ доллари қўшилади” деб таҳдид қилди.
Мен фаолият юритаётган бу боғдорчилик хўжалиги менинг ўз оилам, икки ўғлим ва уларнинг оилалари, ҳамда бир нечта ҳамқишлоқларимизнинг оилалари учун тирикчилик манбаи ҳисобланади. Бизнинг қора меҳнат билан ривожлантиришга уринаётган хўжалигимиз ҳудудидаги биномизни ўзимизда ушлаб қолиш учун бундай “рэкет” йўли билан бировларнинг чўнтагини қаппайтиришимиз, бизнинг ҳаётимизни моддий жиҳатдан издан чиқариб юборади.
Юртбошимиз томонидан инсон манфаатларининг ҳар нарсадан устун қўйилаётган бугунги давлат сиёсатимизда бундай ҳолатларнинг истисно қилиниши учун таҳририятингиздан бу масаланинг қонуний ҳал этилишига мутасадди ташкилотларнинг эътиборини тортишда ёрдам беришингизни, ўзини қонундан устун эканини таъкидлаётган Тўлқинжон Назаровнинг ҳатти-ҳаракатларини жамоатчиликка олиб чиқишингизни илтимос қиламан”...
 
Таҳририятдан: Умид қиламизки, вилоят ички ишлар бошқармаси, вилоят прокуратураси ҳамда бошқа мутасадди ташкилотлар бу хатда билдирилган масалага ўз муносабатларини билдиришади.

Биз Twitterда