Ҳиндистонлик бизнесмен Мукеш Амбани бир кунда 5,8 млрд. доллар йўқотиб, Осиёнинг энг бой одами номини Alibaba эгаси Жек Мага бой берди. Бу ҳақда Bloomberg ахборот агентлиги хабар берди.
Reliane Industries холдинги эгаси Мукеш Амбани нефть нархи қулагани сабабли Осиёнинг энг бой одамлари рўйхатининг 2-ўрнига тушди. Амбанининг айни вақтдаги бойлиги 41,8 млрд долларни ташкил қилмоқда. У дунёнинг энг бой инсонлари рейтингининг 19-ўрнидан жой олмоқда.
Жек Манинг активлари эса 44,5 млрд долларга тенг ва у 18-поғонада турибди. Хитойлик тадбиркор мобил дастурларга талаб ошгани сабаб йўқотишларни камайтиришга эришган. Манинг йўқотишлари 1 млрд. долларни ташкил қилган.
Alibaba Group Хитойнинг энг йирик интернет-компанияси ҳисобланиб, электрон тижорат соҳасида фаолият юритади. Гуруҳ таркибига Alibaba Pictures, Alibaba.com, AliExpress.com, Taobao.com, Tmall.com кабилар киради.
Reliance Industries Limited (RIL) корпорацияси углеводородлар қидириш ва қазиб олиш, нефтни қайта ишлаш ва нефть маҳсулотлари сотиш билан шуғулланади. Бундан ташқари, компания телекоммуникация бизнеси ва ритейл соҳасида ҳам ишлайди.
