Кейинги йилларда мамлакатимизда қишлоқ хўжалигини модернизациялаш ва тармоқнинг рақобатбардошлигини ошириш борасида изчил чора- тадбирлар амалга оширилмоқда. Қишлоқ хўжалиги маҳсулотларини ишлаб чиқариш технологияларини такомиллаштириш, уларни сақлаш, қайта ишлаш ва жаҳон бозорларига экспорт қилиш бўйича йирик давлат дастурлари амалга оширилмоқда. Бу йўлда олимларимиз янги ишланма ва ихтиролари ҳам катта кўмак бермоқда.
Гулистон давлат университети ходимлари қовун мевасини пўстидан тозалаш машинасини ихтиро қилдилар. Бу ҳақда Ўзбекистон Республикаси интеллектуал мулк агентлиги матбуот хизмати хабар бермоқда.
Мазкур машина озиқ - овқат саноати ва қишлоқ хўжалигида қўлланилади. Ушбу фойдали модельнинг вазифаси қовун мевасини пўстидан тозалашда унинг вақтинча қаттиқлигини таъминлашдан иборат. Машина узатма жойлаштирилган, бир-бирига кўзгусифат қаратилган ҳамда айланиш имконияти билан ўрнатилган иккита чангакли корпусдан иборат бўлиб, чангаклардан бири ҳаракатланувчи суппортга жойлашган, иккинчиси эса узатма билан кинематик боғланган. Ҳаракатланувчи суппортдаги чангак валида икки томонлама ўтган канал жойлаштирилган бўлиб, бу каналнинг чиқишига тешик-тешик ҳалқасимон виточкали учлик ўрнатилган, вал сферик шаклдаги резина сўрғич билан ўралган ҳамда сиқилган ҳаво ресивери билан уланган.
Муаллифлар – Фирдавс, Олимжон, Орифжон Рахматовлар ҳамда Карим Нуриев ва Абдумалик Юсуповларга ушбу фойдали модель учун № ФАП 01178 рақамли патент берилди.
Ушбу ихтиро қовун маҳсулотини қуритиш жараёнини тезлаштиради. Катта ҳажмда бу маҳсулотни экспорт қилиш имкониятини беради.
