Жорий йилда Наманган вилоятида ўртача 27,9 центнердан ҳосил кўтариб, 219 минг 800 тонна пахта хом ашёси етиштириш режалаштирилган. Шу мақсадда 3 минг 100 дан зиёд фермер хўжалиги тасарруфидаги 78 минг 900 гектар майдонга ер шароитидан келиб чиқиб, пахтанинг «Наманган-77», С-6524, «Андижон-35», «Наманган-34», истиқболли С-8286, «Бухоро-102» ҳамда бир қатор янги синов навлари районлаштирилган ҳолда экилади. Шу ўринда таъкидлаш жоизки, вилоятда 90 сантиметрли схемада чигит экиладиган майдон 7,6 минг гектарга қисқартирилиб, қўшқатор усулида экиладиган майдон 9 минг гектарга кўпайтирилмоқда ва бу ҳосилдорликнинг ортиши ҳамда меҳнат ва маблағ сарфини камайтиришда катта аҳамият касб этади.
Мавсум учун талаб этиладиган 4 минг тоннадан зиёд сифатли уруғлик чигит тайёрлаб қўйилди. Маълумки, юқори ҳосилдорликка эришишда чигит экиш мавсумини уюшқоқлик билан сифатли ташкил этиш алоҳида аҳамиятга эга. Хизмат кўрсатиш таъминоти бўйича ва бошқа мутахассислардан иборат 263 та отряд тузилди. Уларга 4 минг 858 та техника воситаси бириктирилди.
Чигит экишни 20 мартдан бошлаб 10 апрелда тугатиш кўзда тутилган. Айни кунларда вилоятда режадаги 47 минг 561 гектар майдонга пушта олиш ва яхоб бериш, 37 минг гектарга яқин ўз намига экиладиган контурларда тупроқ намлигини сақлаб туриш учун бороналаш ишлари қизғин давом этмоқда.
