Ўзбекистон терма жамоаси етакчиси, Хитойнинг «Шанхай СИПГ» клуби ярим ҳимоячиси Одил Аҳмедов «Футбол» нашрига берган интервьюсида ҳозирга қадар мухлисларга маълум бўлмаган сирларни очди.
«Қишда менга араблардан жиддий таклифлар бўлганди. Араб клублари анчадан бери ўзлари чорлаб келишади. Шунингдек Франция чемпионати вакили бўлган жамоадан ҳам аниқ таклиф бўлганди. Мен пулни танлаб Хитойга кетганим йўқ. Шунчаки французлар «Краснодар» сўраган маблағни топиб беришолмади. «Шанхай» эса трансферим учун сўралган суммани тўлади.
Хитойда «Краснодар»дагидан кўра, бироз кўпроқ маош оламан. Аммо яна қайтараман Хитойга пулни деб кетганим йўқ. Мен учун пул ҳеч қачон биринчи ўринда турмаган. Мисол учун «Пахтакор»даги биринчи ойлигим қанча бўлганини биласизми? 100 доллардан ҳам камроқ. Ҳозирги ёшлар бу пулга ҳаттоки машғулотда ҳам қатнашмайди.
Мен шугина пулга ҳам боримни бериб ўйнаганман. Олдимга битта мақсад қўйгандим: яхши футболчи бўлиш, ўртамиёна бўлиб қолмаслик.
Ойлигим фақат йўлкирага етарди. Аммо шунинг ўзи ҳам катта гап эди. Ҳозирги ёш футболчилар миллионлаб топа олишлари мумкин. Уларни кузатсанг, ажойиб иқтидор эканига гувоҳ бўласан. Орадан 2-3 йил ўтиб эса улар бутунлай йўқолиб кетишади. Бунга пул сабабчи», - дейди Одил Аҳмедов.
