Айниқса Ҳинд океанининг Африка қитъасини ювиб турувчи ғарбий соҳилларида замонавий қароқчилар тўдалари жуда кўп топилади. Охирги йилларда сомалилик “денгиз ҳукмдорлари” анча донг таратишганди. Сўнгги пайтларда нигериялик бундай “шоввозлар” ҳам йирик денгиз рейдларини амалга ошириб, катта-катта денгиз флотига эга компанияларни ҳам чўчитиб қўйишди.
Шу йилнинг 5 февралида нигериялик қароқчилар Германиянинг Briese Schiffahrts компаниясига қарашли BBC Caribbean юк кемасига талончилик ҳужумини уюштирганди. Натижада қароқчилар томонидан етти нафар рус, бир нафар украин денгизчиси гаровга олинганди.
Кемада омон қолган катта механик, унинг иккинчи ёрдамчиси ва кадет қочишга муваффақ бўлиб, кемани Лас-Пальмас (Испания)га олиб келишга эришгандилар. Кейинчалик улар Россияга келишганди.
Роппа-роса орадан бир ой ўтиб, қароқчилар томонидан гаровга олинганлар озодликка чиқишди. Бунда Россия элчихонаси ва немис компанияси томонидан ҳамкорликда қароқчилар билан ўтказилган музокаралар иш берди. Гаровдагилар эвазига катта пул олган нигериялик талончилар уларни қўйиб юборишди. Уларга қанча пул берилгани ошкор этилгани йўқ.
