Photo: http://www.pakhtakor.uz
Сўнгги пайтларда клубнинг муассислари ўзгариши натижасида Тошкентнинг “Пахтакор” клубида бир қатор ўзгаришлар рўй берганидан хабардормиз. Жамоага тажрибали гуржи мураббий Шота Арвеладзенинг бош мураббий этиб тайинланиши, ортидан бир қатор хорижлик ҳамда маҳаллий истеъдодли футболчилар билан шартнома имзоланиши жамоанинг мақсадлари катта эканидан далолат берганди.
Худди шундай бўлиб чиқди, қисқа давр ичида янги ўйин услуби қуришга эришган“Пахтакор” бугун Фарғонанинг “Нефтчи” жамоасига қарши ўйинни шоуга айлантириб юборди: 6:0!
Биринчи таймда ҳисоб очилмади, лекин танаффусдан кейин мароқли футбол бошланди. Азим Аҳмедов ҳисобни очган бўлса, сўнгги пайтлардан танқид объектига айланган Игорь Сергеев ҳамда бразилиялик янги трансфер қилинган Тиагу Безерра иккитадан тўп киритишди. Охирги нуқтани 89-дақиқада Владимир Козак қўйди.
Ўйиндан кейинги матбуот анжуманида Шота Арвеладзе жамоа аъзоларида биринчи уй ўйинида мухлислар олдида бироз ҳаяжон бўлганини таъкидлаб, “Янги футболчиларга мослашиш учун вақт керак. Биринчи таймда ҳам яхши ўйнадик, лекин гол уришни бажара олмадик. Иккинчи таймда ҳаракатларни тезлаштириш эвазига мақсадга эришдик” деган фикрларни билдирди.
