Анатолий Тимошук футболчилик фаолиятини якунлади

Украина терма жамоасининг собиқ ярим ҳимоячиси Анатолий Тимошук профессионал футболчилик фаолиятини якунлашга қарор қилди.
Бундай қарорга келганини 37 ёшли футболчи Футбол 1 телеканалига интервьюсида тасдиқлади: “Ҳеч қандай жамоа изламаяпман ва тинчгина футболчилик фаолиятимни якунладим. Ҳозир таътилдаман, яқин келажакда нима билан машғул бўлишим ҳақида яқин орада жавоб оласиз. Шуни аниқ айта оламанки, келгусида ёш футболчиларга ўз иқтидорларини намоён этишларида ўз ёрдамимни аямайман».
Тимошукнинг сўнгги жамоаси Қозоғистоннинг “Қайрат” клуби бўлганди. Ўтган йили ноябр ойида қозоқлар билан тузган шартномаси ниҳоясига етганидан сўнг у мураббийлик курсида таҳсил олди. Шу кунларда у PRO лицензиясига эга бўлди.
Узоқ йиллик фаолиятида давомида Анатолий “Волинь”, “Шахтёр”, “Зенит”, “Бавария” ва “Қайрат” клубларида тўп сурди. Чемпионлар лигаси (2012/13), УЕФА кубоги (2007/08) мусобақалари бош совринларини қўлга киритди Уч карра Украина чемпиони (2001/02, 2004/05, 2005/06) ва кубоги (2000/01, 2001/02, 2003/04) соҳибига айланди. Икки марта Россия (2007, 2014/15) ва Германия (2009/10, 2012/13) чемпионатларида ғолиб бўлди.
Украина терма жамоаси сафида 144 учрашувда майдонга тушиб, 4 голга муаллифлик қилган Тимошук 2006 йилги жаҳон, 2012 ва 2016 йилги Европа чемпионатлари финал қисмида иштирок этди.

Биз Twitterда