Наманганда йилнинг энг фаол адолатчи аёли аниқланди

 
Ўзбекистон “Адолат” СДП Сиёсий Кенгаши томонидан анъанавий тарзда ўтказилиб келинаётган “Йилнинг энг фаол адолатчи аёли” кўрик-танловининг Наманган вилояти босқичи бўлиб ўтди. Унда шаҳар ва туманларда саралаб олинган “Адолат” СДП аъзолари иштирок этдилар. Улар Наманган давлат университетининг катта мажлислар зали саҳнасида сиёсий ва маънавият-маърифат соҳасидаги билимларини синовдан ўтказдилар, бадиий ижод ҳамда санъат соҳасидаги иқтидорларини намойиш этдилар.
 
Ушбу тадбирнинг очилиш маросимида сўз олган “Адолат” СДП вилоят кенгаши раисининг ўринбосари Баҳодир Болтабоев ва бошқалар кўрик-танлов  Ўзбекистон Республикаси Президенти Шавкат Мирзиёев ташаббуси билан ишлаб чиқилган  «Ўзбекистон Республикасини янада ривожлантириш бўйича Ҳаракатлар стратегияси»ни амалга оширишган кунларда ўтаётганлиги диққатга сазоворлигини таъкидладилар. Маълумки, мазкур ҳужжатда   яқин беш йиллик мобайнида мамлакатимиз забт этиши назарда тутилган улкан довонлар, халқимиз ҳаёт даражасини юксалтиришнинг механизмлари аниқ белгилаб берилган.
Ўзбекистон “Адолат” СДП вилоят кенгашининг раиси Олимхон Мақсудов:
- Ҳаракатлар стратегиясининг мақсади олиб борилаётган ислоҳотлар самарадорлигини тубдан оширишдан, давлат ва жамиятнинг ҳар томонлама ва жадал ривожланишини таъминлаш учун шарт-шароитлар яратишдан, мамлакатни модернизациялаш ва ҳаётимизнинг барча соҳаларини эркинлаштиришдан иборатдир. Албатта, ана шу улуғвор вазифаларни бажаришда хотин-қизлар ҳам фаол иштирок этиши кўзда тутилган. Улар бугунги кунда   жамият ҳаётининг барча жабҳаларини ривожлантиришга ўзларининг муносиб ҳиссаларини қўшмоқдалар. Яна бир эътиборли жиҳати -  мамлакатимизда аёллар манфаатини ҳимоя қилиш, уларни ҳар томонлама қўллаб-қувватлаш, ўз истеъдод ва қобилиятларини рўёбга чиқаришга катта аҳамият берилмоқда. Ўн уч минг нафарга яқин партия аъзоларининг эллик икки фоизини аёллар ташкил қилаётган Ўзбекистон “Адолат” СДП Наманган вилоят ташкилотининг “Аёллар қаноти” фаолиятини янада такомиллаштиришда ҳам мазкур тадбир алоҳида аҳамият касб этади.
Шуни айтиш керакки, кўрик-танлов иштирокчилари белгиланган учта шартнинг барчасида ўзларини кўрсатишга ҳаракат қилдилар. Айниқса, Мунира Салоҳиддинова (Поп тумани), Волида Муҳаммадиева (Косонсой тумани), Нилуфар Аҳмедова (Наманган шаҳри), Дилором Йўлдошева (Янгиқўрғон тумани) баҳсга пухта тайёргарлик кўрганликларини намойиш этдилар. Аммо биринчи шартни бажаришдан кейиноқ тўпланган балллар бўйича пешқадамликни қўлга киритган уйчилик Соҳиба Жўрабоева охиригача ортга чекинмади. Хусусан, унинг бир қатор ҳамкасблари билан биргаликда тайёрлаб келган саҳна кўриниши томошабинларнинг ҳам, ҳайъат аъзоларининг ҳам юқори баҳосига сазовор бўлди. Бошқа шартларни бажаришда ҳам юқори натижага эришгани учун айнан у ғолиба бўлди. Барча совриндорларга, шунингдек, турли номинациялар бўйича энг яхши деб топилган иштирокчиларга Ўзбекистон “Адолат” СДП Наманган вилоят кенгашининг фахрий дипломлари ва эсдалик совғалари топширилди.
Кўрик-танлов вилоят босқичининг ғолиби Соҳибахон Жўрабоева:
– Мен ўн уч йилдан бери Уйчи туманидаги 16-умумтаълим мактабида ишлайман. Бошланғич синф ўқувчиларига дарс бераман. “Адолат” СДП аъзоси сифатида жамоатчилик ишларида ҳам фаол қатнашаман. Мазкур кўрик-танловда биринчи бор қатнашишим. Менга ҳамкасбларим, директоримиз Муҳаммаджон Зайниддинов бошчилигидаги жамоа вакиллари катта ёрдам кўрсатишди. Тайёрланган саҳна кўринишидаги ролларни ҳам улар ижро этиб боришди. Вилоят босқичидаги ғолиблик айни пайтда зиммамга катта масъулият юклаганини ҳам ҳис этиб турибман. Чунки энди республика босқичида муносиб қатнашиш учун пухта ҳозирлик кўриш талаб этилади.
Бошқа қатнашчилар ҳам бундай  кўрик-танловларда  қатнашиш ҳар бир партия аъзосини ҳар соҳада юксакликка интилишга, ўз устида ишлашга, билим ва маънавият даражасини оширишга  ундашини, олдинга эзгу мақсадларни қўйиб янгидан-янги чўққиларни забт этишга илҳомлантиришини изҳор этдилар.
 
Нурбек АБДУЛЛАЕВ,
Ўзбекистон “Адолат” СДП Наманган вилоят кенгаши матбуот котиби

Биз Twitterда