Ўзбекистон-Қозоғистон дўстлигини бузишга уринишяпти, алданманг!

 
Шавкат Мирзиёевнинг Ўзбекистон Президенти сифатида иш бошлаган биринчи кундан Ўзбекистоннинг ташқи сиёсатида қўшни давлатлар билан дўстлик ва ҳамкорлик биринчи ўринга чиқди. Марказий Осиё давлатларига ва жавоб тариқасида Ўзбекистонга амалга оширилган юқори даражадаги расмий сафарлар, ўзаро кенг мулоқотлар, келишувлар натижасида дўстлик ва қардошлик ришталари кучаймоқда, эшиклар очилмоқда, чегаралар рамзий тус олмоқда.
Дунё геосиёсий харитасида аҳамияти юқори бўлган Марказий Осиё минтақасининг бундай ягона ва ҳамфикр кучга айланиб бораётгани кўпларнинг бу минтақага боғлиқ режаларини остин-устун қилганга ўхшайди. Сабаби, сўнгги пайтда бу минтақанинг икки кучли давлати – Ўзбекистон ва Қозоғистонга “бир бири билан бир қозонда қайнай олмайдиган икки қўчқор калласи” сифатини ёпиштиришга уринишлар иш бермагач, бу икки давлат жамиятига ўзаро нифоқ уруғлари сепиш режаси ишга тушди.
Сўнгги пайтларда кун тартибидан Қозоғистонда ёниб кетган ёки ҳалокатга учраган йўловчилар тушмай қолди. Чапдан-ўнгдан бу воқеаларнинг келиб чиқиш сабаблари ҳақидаги турли “версиялар” пайдо бўла бошлади. Қозоқларни ўзбекларга ёмон кўрсатишга ҳаракат кўзга ташланишга бошлади. Минглаб ўзбекларнинг Қозоғистон ҳудудида меҳнат фаолияти билан бандлигини назарда тутадиган бўлсак, қайсидир бир қозоқ-ўзбек аралаш ўтирган ичкилик столида ўртага ташлаб қўйиладиган кичик бир учқун, миллатлараро низони келтириб чиқаришга етарли бўлишини, “мўлжал” ҳам шу эканини фаҳмлаймиз.
Кеча “Озодлик” Фейсбук саҳифасида эълон қилган материал ҳаммасидан ошиб тушди: “Қозоғистон йўл патруль полицияси ўзбекистонлик ҳайдовчига қарши куч ишлатди. Сизнингча, бу куч ишлатиш керак бўлган ҳолатми? Ижтимоий тармоқларда Қозоғистон йўл патруль полицияси ўзбекистонлик ҳайдовчига қарши куч ишлатаётгани ва уни ҳибсга олаётганини акс этган видео тарқалди” деган кичик матн билан, Қозоғистон полицияси билан Ўзбек йигитлар ўртасида бўлиб ўтган тортишмани кун тартибига келтирибди бу “холис фикрли”лар. Ижтимоий бир масала, Ўзбек ички ишлар ходими билан Ўзбекистон фуқароси ўртасида мамлакатимиз ҳудудида ҳам, АҚШ полицияси билан мексикаликлар ўртасида бундан минг чандон шиддатли кўринишда Америка ҳудудида ҳам, ёки бўлмаса Қозоғистоннинг ўзида йўл патруль полицияси билан қозоқ фуқаролар ўртасида рўй бериши мумкин бўлган ҳолат. Кимнинг қонунга бўйсунмагани, кимнинг ўз мансаб ваколатини ошириб юборганини суд орқали ҳал этса бўладиган бир воқеълик. Балкида сўнгги пайтлардаги ҳодисалар бўлмаганда “Озодлик” саҳифасида ҳам балки эътиборсиз қоладиган бир лавҳа. Аммо... бу ерда қандайдир занжир тизими мавжудлиги кўринаётгандай. Бу хабарни ижтимоий тармоқларда айлантириш орқали келгуси жиддийроқ зиддиятларга замин тайёрланаётгандай. “Озодлик”нинг асл мақсад-вазифаларининг нима эканлиги-ю, унинг ортида АҚШнинг қайси хизматлари борлигини эътиборга оладиган бўлсак, хавфнинг нақадар катта эканини англаб етса бўлади. Масаланинг бу жиҳатига ҳар икки жамиятда тўғри фикрли инсонлар орқали, матбуотда кенг шарҳлар билан аҳолини эътиборини тортмасак, кейин кеч бўлади. Демади деманг...
Дилмурод Жумабоев

Биз Twitterда