Ўзбекистон Республикаси Президенти Шавкат Мирзиёев “Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонни имзолади.
Фармонга мувофиқ Ўзбекистон Республикаси Конституциясининг 93-моддаси 23-бандига асосан билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган жазо муддатини ўтаётган 58 нафар фуқаро афв этилди. Уларнинг 5 нафари Наманган вилояти фуқароларидир.
6 февраль куни Наманган вилоят ҳокимлигининг жамоат ва диний ташкилотлар билан ишлаш котибияти ташаббуси билан ушбу фуқароларнинг ҳолидан хабар олинди. Уларни оиласи ва яқинлари бағрида, ижтимоий ҳаётга мослашган ҳолда фойдали меҳнат билан шуғулланишлари учун шароит яратиб бериш чоралари кўрилмоқда. Соғлом турмуш тарзини йўлга қўйиб, жамиятда муносиб ўрин топишлари учун уларга кўмаклашилади.
Бу воқеа юртимизда олиб борилаётган инсонпарварлик сиёсатининг, халқимизга хос бағрикенглик, кечиримли бўлиш, олижаноблик ва меҳр-мурувват кўрсатиш каби эзгу фазилатлар намоён бўлганлигининг амалий ифодасидир.
