Қурбон ҳайити ва ИЭС 1-блокининг газ-турбина қурилмаларини келтириб, ўрнатилиши муносабати билан Тўрақўрғон иссиқлик электр станциясида бугунгача амалга оширилган ишлар ва келгусидаги режалар билан таништириш мақсадида эҳсон дастурхони ёзилди. Кенг жамоатчилик вакиллари таклиф этилган бу тадбирда Наманган вилояти ҳокими Хайрулло Бозоров ҳам иштирок этди ва қурилиш ишларининг бориши билан танишди.
“Ўзбекэнерго” давлат акциядорлик компанияси буюртмаси асосида бунёд этилаётган мазкур станциянинг умумий лойиҳа қиймати 1 миллиард 195 миллион 870 минг долларга тенг. 2016 йил 20 апрель куни “Тўрақўрғон ИЭС” қурилиши бўйича ўтказилган халқаро тендерда ғолиб чиққан Япониянинг “Mitsubishi Corporation” “Mitsubishi Hitachi Power Systems” компаниялар консорцуми бош пудратчи сифатида имзоланган шартномага асосан иш олиб бораётган бу лойиҳада, Туркиянинг “Çalik Enerji” компанияси қурилиш-монтаж ишларини амалга оширмоқда. 2400 дан зиёд , жумладан 350 хорижлик мутахассис меҳнат қилаётган иншоотда бугунга қадар 167 миллион 400 минг АҚШ доллари миқдорида иш бажарилди.
Тўрақўрғон иссиқлик электр станциясининг ишга туширилишини нафақат наманганликлар, балки Фарғона водийси аҳли сабрсизлик билан кутмоқда. Бу иншоот минтақада электр таъминотидаги муаммоларни енгиллатиш билан бирга, иқтисодий ва ижтимоий ривожланиш, ҳаёт фаровонлиги, турмуш маданиятининг юксалишига хизмат қилади.
расмлар муаллифи: Ҳотам Мамадалиев
