©vodiymedia. Иномжон Шаробиддинов олган сурат.
Франция ривожлантириш агентлигининг (AFD) экспертлари Бенуа Февр-Дюпэгр ва Гаэль Балино агентликнинг Тошкентдаги бюроси раҳбари Рафаэл Жозан бошчилигида Наманган вилоятига ташриф буюришди.
Vodiymedia.uz сайти бош муҳаррири Анвар Икромов Ўзбекистонда аграр соҳада ислоҳотлар ўтказиш, қишлоқ хўжалиги диверсификацияси стратегиясини ишлаб чиқиш, рақобатбардошликни ривожлантириш бўйича лойиҳаларни амалга оширишга кўмаклашиш учун жойларда ўрганиш олиб бораётган бу француз молиявий институти вакиллари билан учрашди.
- Мен учун Наманган бегона эмас, - деб гап бошлади Рафаэл Жозан, - Ўн беш йил аввал талабалик давримда бу ерда амалиёт ўтаганман. Бугунги қишлоқ хўжалигини ўша давр билан солиштирадиган бўлсак, ўзгаришлар катта, сезиларли диверсификация олиб борилмоқда. Соҳага замонавий технологияларни жорий этилмоқда. Мамлакатингизда олиб борилаётган қишлоқ хўжалиги тараққиётига Франция ривожлантириш агентлиги ҳисса ҳам қўша олса, бундан мамнун бўламиз. Агентлигимиз Тошкент бюросига ҳозир Франциядан кучли экспертлар келиб қўшилган. Улар ёрдамида вилоятларда бўлиб, қўллаб-қувватланиши мақсадли бўлган лойиҳалар билан танишмоқдамиз. Мақсадимиз вилоятларда логистикани ривожлантириш, қишлоқ хўжалик маҳсулотларини, қолаверса, маҳсулотни етиштириш жараёнини сертификатлашни халқаро андозаларда ташкил этиш бўйича ҳамкорлик қилиш.
- Авваломбор, юксак меҳмондўстлик учун ўз ташаккуримизни изҳор этишимиз лозим, - дейди Франция ривожлантириш агентлигининг қишлоқ хўжалиги, қишлоқ тараққиёти, биохилма-хилликни барқарор ривожлантириш департаменти вакили Бенуа Февр-Дюпэгр. – Ўтган ҳафта ташриф буюрдик мамлакатингизга. Ўрганишларимизни Тошкент вилоятида бошладик. Кўрганларимиз мамлакатингизнинг қишлоқ хўжалиги борасидаги сиёсатини тушуниб етишга асос бўлди. Ўзбекистон қишлоқ хўжалигини қай йўналишда ривожлантирмоқчи, бу борада қандай ишлар амалга оширилмоқда, бу ҳақда бизда тасаввур пайдо бўлди. Қишлоқ хўжалиги мутахассислари бўлганимиз учун бу соҳадаги ютуқларингизни кўришни истагандик. Эътироф этиш керак, юртингизнинг қишлоқ хўжалик соҳасида салоҳияти, фойдаланилмаган имкониятлари жуда юқори. Диверсификацияни янада кучайтириш орқали катта ўсишга эришса бўлади. Бу борада биз ҳам кўмак бериш ниятидамиз.
- Ўзбекистон қишлоқ хўжалигида қайси жабҳаларда инвестиция талаб этилади, қишлоқ хўжалигини жаҳон даражасига олиб чиқиш учун нималар кераклиги борасида Франция ўзининг катта тажрибаси билан ўртоқлашишга тайёр. – деб, ўз фикрини баён қилди француз агентлиги иқтисодчиси, тадқиқотчи Гаэль Балино.
Меҳмонлар Наманган вилоятдаги қатор илғор агросаноат комплексларида бўлиб, вилоят қишлоқ хўжалигининг бугунги ҳолати бўйича ўрганиш ишлари олиб борадилар, ҳамкорлик истиқболларни муҳокама қиладилар.
©vodiymedia
