Коррупцияга қарши курашиш бўйича Парламент ва Президентга бўйсунадиган алоҳида давлат органи яратилади. Бу ҳақда Шавкат Мирзиёев Олий Мажлисга Мурожаатномасида айтиб ўтди. Давлат раҳбарининг билдиришича, коррупцияга қарши курашиш бўйича янги тизим жорий қилинади. Жумладан, коррупциянинг эрта олдини олиш тизими шакллантирилади.
Бундай ўзгаришлар мамлакатимизда давом этаётган ислоҳотлар доирасида жамият ҳаётининг барча соҳаларида коррупциянинг намоён бўлишига йўл қўймаслик учун хизмат қилади.
Мурожаатномага кўра, коррупцияга қарши курашиш бўйича Парламент ва Президентга бўйсунадиган алоҳида давлат органи яратилади.
Янги орган фуқаролар ҳуқуқлари, эркинликлари, манфаатларининг устуворлиги, тизимлилик, жавобгарликнинг муқаррарлиги каби муҳим тамойилларни коррупцияга қарши курашишда устувор принциплар сифатида назарда тутади.
Шунингдек, давлат органи фаолиятининг ҳар бир жабҳасида ошкоралик тамойили жорий қилинади. Бу янги тайинланётган ходим ва раҳбарнинг қариндошлари тўғрисидаги маълумотлардан тортиб, то давлат хариди бўйича маҳсулот етказиб берувчи корхона таъсисичилари рўйхатигача бўлган маълумотларни ошкор қилиб боришни назарда тутади.
Президент «Коррупцияни йўқотиш учун «Ҳалоллик вакцинаси»ни қаердан оламиз?!» деди ва у бу иллатга қарши айнан янги ташкил этиладиган орган шуғулланишини таъкидлаб ўтди.
