Очиғи, юртимизда туризмни ривожлантириш йўлида олиб борилаётган катта ислоҳотлар, ҳукуматнинг бу соҳа тараққиётига бўлган жиддий эътибори қувонарли ҳол. Лекин, ўзингизни келаётган туристнинг ўрнига қўйиб кўринг, “яна қайтишим керак Ўзбекистонга” деган фикр ҳаммада ҳам бўлмайди. Сабаби-ми? Сабаби оддий: Сизни туризм агентлиги олиб келиб, Самарқанддаги, Бухородаги бир меҳмонхонага жойлаштиради, гуруҳ бўлиб барча зиёратгоҳларга борасиз, ҳаммасини айни гид айни шаклда ҳикоя қилиб беради...
Яқинда Туркия туризм вазири Наби Авжи биз билан суҳбат чоғида шундай фикр билдирди: “Биз Ўзбекистонга Туркиянинг туризм соҳасида йўл қўйган хатолари ҳақида айтиб бермоқчимизки, Ўзбекистон ундай хатоларни четлаб ўтиб, туризмни тезроқ ривожлантиришга эришсин...”
Туркиядай туризм ривожланган давлатнинг туризм борасида йўл қўйган хатоси мамлакатни танитишда “қуёш, денгиз, қум” хусусларига кўпроқ эътибор берган. Ҳозирга келибгина бу мамлакат туризмда турли бошқа йўналишларни, хусусан экотуризм, тиббиёт туризми, савдо туризми кабиларни ривожига эътибор қаратди.
Ўзбекистон ҳам хорижий туристларни жалб этишда асосий бренд сифатида Самарқанд, Бухоро, Хива тарихий ёдгорликларига таянмоқда. Лекин жаннатмонанд юртимиз ўзига хорижликни жалб этиш учун саноқсиз имкониятларга эга.
Шундай ўзига хосликлардан бири – юртимиз тупроғида етишган бир-биридан тотли мева ва полиз экинлари ҳамда Ўзбекистоннинг дунё таниган хусусларидан бири – пахтачиликдир.
Тасаввур қилинг, хорижлик сайёҳ эрта тонгда далада, қовун полизи бошида уйғонди. "Гурскетди" деган ибора бор қишлоқларда, қовун тунда банд бериб, гурсуллаган товуш чиқади атрофга. Ана шундай товушлар остида уйғонган меҳмон пайкалга кириб, ўзи танлаган қовунни олиб чиқиб, дала бошидаги тол остида сўйиб ейишини бир томоша қилинг... “Экологик тоза маҳсулот” дамини олади бунинг олдида. Тушдан кейин йўл узумзорга қараб бошлайди. Карсиллаган узумлар токдан узиб тановул қилиниши мумкинлигини кўрган хорижлик кейинги йили бола-чақасини етаклаб келмаслиги мумкинми?!
Эртаси куни бир пахта даласига бошласак бу сайёҳларни: ўз кўзи билан кўрсин Ўзбекистонда пахта қандай терилади. Қўлига этакни тутқазилса, бир пахта териб кўришдек экзотикани уларга ким ҳам бера оларди бошқа ўлкада! Қолаверса, пахтани болалар термаётганини кўрсатиш учун бундан самарали йўл бўлмаса керак.
Хуллас, туризм агентликларига янги йўналишлар ғояси тақдим этамиз: Cotton-picking tours, Melon-harvest tours… У ёғи фантазиянгизга қолган иш. Маслаҳат учун тўловни фойдадан берсангиз ҳам розимиз...
Дилмурод Жумабоев
