Ўзбекистон Республикаси Президенти Шавкат Мирзиёевнинг Туркия Республикаси Президенти Режеп Таййип Эрдўғоннинг таклифига биноан 2017 йил 25-26 октябрь кунлари Туркияга давлат ташрифи доирасидаги музокаралар якунида иқтисодиёт, савдо-сотиқ, саноат, банк-молия, инвестиция, туризм, транспорт-логистика, соғлиқни сақлаш, кадрлар тайёрлаш, мудофаа ва бошқа соҳалардаги ҳамкорликни ривожлантиришга доир 20 дан зиёд ҳужжат қабул қилинди.
Шулардан бири, Туркиянинг Nurol Makina ve Sanayi A.Ş. ширкати билан "Ўзавтосаноат" АЖ ўртасидаги шартнома бўлди. Унга кўра, ҳарбий техника ишлаб чиқариш соҳасида нафақат Туркиянинг, балки дунёнинг энг таниқли компанияларидан бири, Nurol Makina томонидан ишлаб чиқариладиган “Эждер Ялчин” 4x4 бронетранспортерларини Ўзбекистонда ишлаб чиқариш йўлга қўйилади.
Nurol Makina ve Sanayi A.Ş. матбуот хизматининг айтишича, келишувга асосан, Ўзбекистонда "Ўзавтосаноат" ва Nurol Makina ҳамкорлигида ташкил этиладиган бу янги заводда 1000 та “Эждер Ялчин” 4x4 зирҳли ҳарбий транспорт воситаси ишлаб чиқарилади.
