Ўзингни босвол, "блоггер"! - Вазирлар Маҳкамаси қарори ижроси учун туман ҳокими айбдор бўладими?

 
Сўнгги икки-уч ой ичида Наманган вилоятининг Мингбулоқ тумани ўзини “блогерман” деб эълон қилганларнинг нишонига айланиб қолди. Туман марказида амалга оширилаётган “Обод марказ” дастури доирасида бузилган уй-жойлар масаласида бир неча видеолар эълон қилинди.
Сўнгги ҳафтада бу “фаоллик” яна бўй кўрсатди. Аввал туманда яшовчи бир неча фуқаронинг уй-жой бузилиши ҳамда эҳтиёжманд аёлларни уй-жой билан таъминлаш масаласида шахсан Президент номига мурожаат қилаётганлари видеоси тарқалди. Бу борада бугун Мингбулоқ туман ҳокимлиги жуда жўяли ҳамда батафсил ўз баёнотини эълон қилди, буни Vodiymedia.uz сайтида ҳам кўчириб босдик.
Шу билан бирга, ўзини блоггер деб ҳисоблайдиган Насим Холов исмли соқолли бир йигит, туманда умуман бўлаётган масалалар ва жараённи тушунмаган ҳолатда “ХОКИМ ЁКИ ХАЛК, БУ НИМА АХВОЛ ? НАМАНГАН МИНГБУЛОК” деб номли видео тарқатибди.
 
 
Минбулоқ туманида маҳаллий аҳолининг ўзаро тортишмаси билан бошланаётган лавҳани ортидан бу Насим Холов исмли шахс, “основной фермерлар” билан кўришганини айтиб, фермерлар мурожаатларини тинглашни сўраяпти. Давомида, эътибор билан қаранг, Поп туманидан (!) келган фермер аёл чиқиб кластер керак эмас деб чиқиш қиляпти.
Менимча, бу “блоггер” Поп туманини Мингбулоқ туманининг бир бўлаги деб ўйлаган шекилли, фермер аёлнинг ортидан сўз олиб, Мингбулоқ туман ҳокимига ақл ўргатяпти.
Шу ўринда савол туғилади, “блоггер” Насим Холов билармикан, Мингбулоқ ва Поп туманларида қишлоқ хўжалиги фаолиятини амалга оширувчи 19 та корхонадан ташкил топган Агросаноат кластерини ташкил этиш, Мингбулоқ тумани ҳокимининг хоҳиши билан эмас, Ўзбекистон Республикаси Бош Вазири Абдулла Арипов имзоси билан 2019 йил 5 сентябрь куни қабул қилинган, Вазирлар Маҳкамасининг 736-сонли қарори билан амалга оширилаётганини?!
Кластернинг таркибига кирувчи 19 та агросаноат корхоналари орқали 2019-2022 йилларда Мингбулоқ ва Поп туманларида қишлоқ хўжалиги маҳсулотлари етиштириш ва қайта ишлаш, уруғчиликни ривожлантириш, иссиқхоналар қуриш ва ҳ.к. билан боғлиқ $114,2 млн миқдордаги инвестиция лойиҳаларини амалга оширилишини-чи?!
Ижтимоий тармоқлар орқали чиқишлар уюштираётган шахслар, ўзларига қилинаётган мурожаатнинг таги нима эканлигини бир суриштириб қўйишлари керакми ёки ким нимани гапирса, ўша нуқтаи назардан маҳаллий ҳокимиятни обрўсизлантириб кетаверадими?!

Биз Twitterда