Интернетда АвтоВАЗнинг янги ишланмалари сурати пайдо бўлди. ВАЗ-2101нинг афсонавий «копейка»си йўлларга қайтмоқда. Янги кузовли автомобиль «Лада-Мустанг» номи билан йўлларга чиқади.
«Копейка» номи билан машҳур бўлган ва собиқ иттифоқда энг кўп сотилган машиналар қаторидан жой олган "ВАЗ-2101"нинг янги модели эски турдошига умуман ўхшамайди. Ташқи кўриниш борасида Ford Mustang ва Chevrolet Camaro спорткарларини кўп жиҳатлар билан такрорлайди.
Техник тавсифи борасида тўлиқ маълумотлар ҳозирча йўқ. Унга 2.0 литрли кучайтирилган, 200 от кучига эга мотор ўрнатилади. Ёқилғи сарфи 100 км.га 6 литр бўлиши кутилмоқда. Машина 2017 йил охиридан савдога чиқади.
"ВАЗ-2101" автомобили 1970 йил апрелидан ишлаб чиқарилиб, жами 4,85 млн. дона сотилган.
Янги моделнинг тест жараёнларидаги илк суратлари «Елабуга автомаркази»нинг инстаграмдаги расмий саҳифасида эълон қилинди.
