Турк матбуоти Фетуллаҳ Гюленнинг асл башарасини илк англаган Ўзбекистон эканини кенг ёритмоқда

 
Яқинда Туркияда 2016 йил 15 июлдаги давлат тўнтаришига муваффақиятсиз уринишнинг бир йиллиги муносабати билан кенг миқёсда тадбирлар бўлиб ўтди. Дунёнинг кўплаб ўлкаларидан, хусусан Ўзбекистондан ҳам бир қатор журналистлар бу жараёнга таклиф этилди.
Туркиянинг қатор давлат ва жамоат арбоблари мамлакатга ташриф буюрган журналистлар билан учрашувлар ўтказишди. Ана шундай учрашувлардан бирида Туркия ҳукумати тепасидаги партия – AK Parti спикери ва партия раисининг ўринбосари Моҳир Унал билан бўлиб ўтди.
Ўз сўзида Унал Туркияда 2014 йилга қадар Фетуллаҳ Гюлен раҳнамолигидаги ФЕТО ташкилотининг асл моҳиятини ҳеч ким англолмаганини таъкидлагач, бунга қарши ўлароқ ўзбекистонлик машҳур журналист, Qalampir.uz ахборот сайти раҳбари Қамариддин Шайхов эътироз билдириб, Ўзбекистон Гюлен мактабларини 1999 йилдаёқ ёпганини эслатди ҳамда ҳали ҳамон бундай мактаблар фаолият олиб бораётган мамлакатлар билан Туркия ўз муносабатларини қандай ташкил қилмоқчи эканини сўради. Аммо, ўз сўзини нотўғри эканини, ФЕТО хавфи аввалдан билинганини айтишни ҳоҳламаган Унал берилган тузатишга муносабат билдиришдан ҳамда саволга жавобдан қочиб қўя қолди.
Орадан бир ҳафта ўтмай, бугунги турк матбуотида кўплаб нашрларда “ФЕТО мактабларини биринчи бўлиб беркитган Ўзбекистон бўлди” деган мазмундаги хабарлар бош саҳифадан ўрин олди. Қувонарлиси, сиёсатчи эътироф этишни истамаган ҳолатни турк журналистлари эътибор марказига олишганини, ўзбекистонлик ҳамкасабаларига сиртдан жавоб тариқасида кўриш мумкин.

Биз Twitterда