Туркия элчиси ўзбек журналистлари билан учрашди

Article
Туркиянинг Ўзбекистондаги фавқулодда ва мухтор элчиси Аҳмет Башар Шен ўзбек матбуоти вакиллари билан танишув учрашуви ўтказди. Туркиянинг Ўзбекистондаги элчихонаси матбуот хизмати раҳбари Исмаил Козан томонидан учрашувда Туркий ҳамкорлик ва координация агентлиги (TİKA) бошқарувининг Тошкентдаги дастур координатори профессор Сулейман Қизилтопрак ҳамда элчихонанинг бошқа расмий вакиллари иштирок этишди. Бу ҳақда haberler.com хабар берди.
Элчи ўз кириш сўзида Ўзбекистонга элчи бўлиб тайинлангани ўзи учун ифтихор эканини таъкидлади.
Ўзбекистоннинг катта салоҳиятга эга эканини, Марказий Осиё аҳолисининг деярли ярми Ўзбекистонда яшашини айтиб ўтган Шен, Туркия Ўзбекистон билан ҳозирги ҳамкорликдаги лойиҳаларни янада ривожлантиришга ва янги тараққиёт стратегиясида керакли шериклик ва ҳамкорликка тайёр эканини билдирди.
Аҳмет Башар Шен, икки ўлка ўртасидаги алоқаларнинг янги даври бошланганини таъкидлаб, Ўзбекистон ва Туркия президентларининг Самарқанддаги учрашувида ҳар икки томон ҳам муносабатларни энг юқори даражага чиқаришдан ҳамфикр бўлишганини такрор тилга олди.
 Бу йил икки мамлакат ўртасида юқори даражали бир қатор музокаралар бўлишини, Қўшма иқтисодий комиссия ва Бизнес форум ўтказилишини маълум қилган Шен, 2017 йил Ўзбекистон-Туркия муносабатларида янги саҳифа очишини эътироф этди.
Туркияда 15 июль куни Фетҳуллаҳ Гюлен террористик ташкилоти (FETÖ) томонидан амалга оширишга уринилган муваффақиятсиз давлат тўнтариши ҳолатига баҳо берган элчи “Туркиянинг ўша қоронғу туни эртасига ёруғ кунни олиб келди ва бу ёруғлик Туркиянинг келажагини ҳам янада ёритди” деб изоҳ берди.
Туркий ҳамкорлик ва координация агентлиги (TİKA) бошқарувининг Тошкентдаги дастур координатори профессор Сулейман Қизилтопрак ўша хоинларча давлат тўнтаришига уриниш ҳақида ўзбек журналистларига батафсил маълумот бераркан, Фетҳуллаҳ Гюлен ташкилотининг асл башараси Ўзбекистон томонидан кўп йиллар аввал очилганини ва шу сабабли Ўзбекистонда бу ташкилотнинг фаолияти ўша пайтдаёқ таъқиқланганига урғу берди.

Биз Twitterда