Эронни ютишимизга ким ишонганди? Ҳеч ким!!! Сабаби оддий – жамоа бошида Самвел Бабаян бор экан, бу жамоа ҳеч бир натижага эриша олмаслиги барчага кўпдан аён эди. Ўтган турда Сурияга имкониятни бой бергач, Самвелнинг кавушини тўғрилаш керак эди ўзи аслида. Янги мураббий билан Теҳронда йигитлар бошқача ўйин кўрсатишлари аниқ эди...
Самвел Бабаяннинг Эронга мағлубиятдан сўнг матбуот анжуманидаги сўзларига қаранг: "Жаҳон чемпионатига чиқиш учун имконият сақланиб қолди. Қолган икки ўйинда сифатли ўйин кўрсатиб, бор кучимизга ишга солган ҳолда ғалаба қозонишимиз ва олдинга интилишимиз керак”. Уят ҳам йўқ! Икки ўйиндан сўнг Қатардаги жаҳон чемпионатига чиқиш учун имкониятлар ҳақида гапирса керак.
Бабаяннинг ўзбек футболида нони тугади. Энди “Пахтакор” уни жамоа машғулотларига яқин йўлатмаслиги тайин. Терма жамоадан ҳам кеч бўлсада лаш-лушини йиғиштиради, бошқа чора қолмади. Бундан буёғига ўзи бирор клубни сотиб олмаса, ҳеч бир мутасадди ўз клубига уни чорламайди мураббий сифатида.
Эрондаги ўйинни қаранг: бу йигитлар бошқача ўйнай олади шубҳасиз. Техникалари ўзгармас балки, тезликни табиат инъом этганидан ортиғини кутиш кераксиз, бироқ мураббий дегани жамоага ишонч бериши керак, унинг айтганини, кўрсатмасини бажарсак, ютамиз албатта, деган фикр бўлиши керак футболчиларда. “Озоди”да эса ўйинга берилган кўрсатма “ютишимиз керак, ё бўлмаса ҳеч бўлмаганда дуранг керак бизга” шаклида бўлганга ўхшайди. Йигитлар ҳаракат қилишди, бироқ ҳар ким “Ватан учун” деб ўз ҳолича ўйнади, тактика деган нарса умуман кўринмади.
Сурия мағлубиятидан кейин биринчи бўлиб бонг урдик, Бабаян кетиши керак бу жамоадан дея. Игор Шквиринни тезлик билан ишни ўз қўлига ола оладиган мураббий деб, мутасаддиларимизга тавсияда ҳам бўлдик. Хорижлик мураббий бу ҳолатимизда бизнинг термага яқинлашмайди, сабаби ўхшамай қолса кейинги контрактнинг суммаси камроқ бўлишини яхши билади. Хорижлик учун биринчи ўринда пул туради. Ватаним деб, ўзбек футболи шаъни деб жон куйдирадиган, шу билан бирга қўлидан иш келадиган мураббийларимиз кўп эмас ўзи. Бир нечтаси бош мураббийлик қилиб ҳам кўришди терма жамоада. Ҳозирча имкон берилмаганлардан Игор Шквирин қолди. Агар гуруҳда ҳеч бўлмаганда учинчи ўринни сақлаб қолайлик дейдиган бўлсак, эртагаёқ мураббийни янгилашимиз керак!
Агар бугунги ўйиндан кейин ҳам Самвел Бабаян термани бошқаришда давом этадиган бўлса, терма жамоамизнинг нурсиз ўйинлари сабаб Ўзбекистонда аҳолининг ижтимоий кайфиятини атайин бузиш деган айблов билан бир неча кишига маъмурий-жиноий жавобгарлик очса бўладиган ҳолатга юз тутади ўзбек футболи. Мутасаддиларимизга футболнинг мухлислар учун ўйналишини эслатиб қўймоқчимиз!
Дилмурод Жумабоев
