Ўзбекистон Футбол Федерацияси Ўзбекистон миллий терма жамоасига бош мураббий жалб этиш бўйича бир неча хорижлик мутахассислар билан музокаралар олиб бораётгани эълон қилинди.
Кучли ПИАР акцияга ўхшайди, узундан узун рўйхат ҳам қўшимча қилинди: руминиялик Дан Петреску, сербиялик Славолюб Муслин, черногориялик Миодраг Радулович, италиялик Анжелио Алессио, германиялик Бернд Шторк, хорватиялик Бранко Иванкович, италиялик Вальтер Маццари, голландиялик Берт ван Маарвейк ва яна бир хорватиялик мураббий Славен Билич... Баъзи нашрлар бу рўйхатдан ким бизга "энг муносиб" деб мухлислар ўртасида сўров ҳам ўтказиб бўлишди.
Очиғи, бу эълон қилинган янгиликдаги фактларга зарра ҳам шубҳам йўқ. Лекин музокара дегани шартнома тузилди дегани эмас. Пошшонинг қизига совчи қўйиш чўпоннинг ҳуқуқи, совчини ҳайдаб солиш пошшонинг. Лекин чўпон ҳам айтиши мумкин оммага, пошшонинг қизига совчи жўнатдим, икки томон гаплашишяпти деб...
Хуллас, бу рўйхатдан Вальтер Маццари ва Славен Билични хотиржам ўчириб ташласа бўлади, бу иккисига Европада талаб етарли.
Рўйхатдаги тренерларнинг баъзилари Осиёнинг “мазахўраклари” ҳисобланади. Араб ўлкаларидан тортиб Чин диёригача бўлган ҳудудда ўз номларини сотиб жамоа алмаштиришга уста бўлиб кетишган.
Яна баъзи эълон қилинган исмлар мураббий сифатида ёмон эмас-у, лекин отнинг калласидай пул бермасангиз келмайди. Унақа пул бўлганда Федерацияда, раҳматли Валерий Лобановскийнинг конспектларини ўқиб бўлса ҳам термани жаҳон чемпионатига олиб чиқса бўларди ҳар ойда биттадан кучли рақибга қарши ўйин ташкиллаб....
Хуллас, айланиб келиб, юртимиз футболи билан таниш деган формулировка билан, черногориялик Миодраг Радулович терма жамоамизга келаётганга ўхшайди бош мураббий сифатида. Ҳа Бабаян, ҳа Радулович, нима ўзгаради?! “Хорижнинг музқаймоғи” бўлганими фарқи?
Хорижлик мураббий чақириладиган бўлса, унинг исмига учмаслик керак. Майли ёш бўлсин, катта ютуқларга эришмаган бўлсин, лекин ўзининг мураббийлик фалсафаси бўлсин. Ўзбекистондек терма жамоада ишлашни ўзига фахр деб билсин, бу жамоани жаҳон чемпионатига олиб чиқишим керак деган ғояни ҳаётининг мазмунига айлантира оладиган мураббий керак бизга.
Яна бир хусус, Ўзбекистонга келиб ишлайдиган мураббийни Россиядан ёки Украинадан қидириш керак. Мураббий биринчидан тилни билиши, иккинчидан маҳаллий ижтимоий воқеликларни тўғри тушуниб ета олиши керак. Шундагина у футболчилар руҳиятини англаб етади. Терма жамоа мураббийи уч кунлик ўйин олди машғулотида “физика” билан шуғулланмайдику ахир...
Дилмурод Жумабоев
