Шавкат Мирзиёев – 2018 йилда сиёсат соҳасида "Осиёда йил одами!"

 
СЕУЛ / VodiyMedia / – Ўзбекистон Республикаси Президенти Шавкат Мирзиёев, Осиё Журналистлари Ассоциацияси талқинига кўра 2018 йилда сиёсат соҳасида “Осиёда йил одами” деб топилди!
Осиё Журналистлари Ассоциацияси Ижроий қўмитаси аъзоси ҳамда унинг Ўзбекистондаги вакили, Vodiymedia.uz ахборот-таҳлилий нашри раҳбари, халқаро журналист Дилмурод Жумабоев томонидан тақдим этилган Шавкат Мирзиёев номзоди, Ассоциация аъзолари ҳамда Кенгаши томонидан тўла қўллаб-қувватланди. Бошқа минтақавий вакиллар томонидан номзодлари киритилган сиёсатчиларга нисбатан Шавкат Мирзиёевнинг Осиё сиёсий саҳнасидаги роли бениҳоя катта эканлиги эътироф этилди.
Ўзбекистон Республикаси Президентининг фаолиятини баҳолар экан, Осиё Журналистлари Ассоциацияси шундай таъриф келтиради: “Мирзиёев 2016 йил декабрда Президент этиб сайлангандан сўнг, инсон ҳуқуқларини таъминланиши, иқтисодиётнинг очиқлашуви борасида катта ижобий натижаларга эришди, сиёсий маҳбусларнинг озод қилиниши, ҳуқуқ-тартибот идораларининг ислоҳ қилиниши ҳамда хусусий бизнеснинг ривожи воқеъ бўлди. У (Шавкат Мирзиёев) қўшни давлатлар билан ҳамкорлик ва ўзаро муносабатларни яхшилаш орқали Марказий Осиё минтақасида тинчлик қарор топишига катта ҳисса қўшди”.
Марказий офиси Жанубий Кореянинг Сеул шаҳрида жойлашган, қитъанинг 50 дан ортиқ мамлакатларининг 150 дан зиёд энг таниқли халқаро журналистлари, давлатлар матбуот стратегияларини белгиловчи идеологлари, ҳамда таҳлилчи-экспертларини ўз атрофида бирлаштирган Осиё Журналистлари Ассоциациясининг электрон ахборот нашри THEAsiaN.asia ҳамда босма нашри MagazineN томонидан ҳар йили уч категорияда – сиёсат, иқтисодиёт ва бизнес, жамият ва маданият йўналишларида Осиёнинг энг яхшилари аниқлаб келинади.
2004 йилдан бери фаолият юритиб келаётган Осиё Журналистлари Ассоциациясининг талқини шуниси билан аҳамиятлики, унда Осиёда деярли барча давлатларнинг кучли журналистлари фикрига кўра натижа эълон қилинади. Қолаверса, тўрт тилда – инглиз, корейс, араб ва хитой тилларида юритиладиган THEAsiaN.asia ахборот нашри ҳамда бутун дунё бўйлаб тарқатиладиган MagazineN журнали халқаро сиёсий майдонда катта таъсирга эга ҳисобланади.
Бу йил Шавкат Мирзиёев 2018 йилда сиёсат соҳасида “Осиёда йил одами” деб топилган бўлса, LG Компаниялар гуруҳи раҳбари Ку Бон Му ўз компаниясини ижтимоий лойиҳаларни кенг қўллаб-қувватловчи дунёнинг энг йирик компаниялари қаторига киритган, LG оиласида инсонийликнинг бизнесдан аввал келишини тарғиб қилгани учун иқтисодиёт ва бизнес соҳасида 2018 йилда “Осиёда йил одами” бўлди. (Ку Бон Му 2018 йил май ойида вафот этганди). Африка ва Европада юзлаб бепул юрак амалиёти ўтказиб, инсонларни ҳаётга қайтарган, келиб чиқиши мисрлик бўлган кардиоторакал хирург Хабиб Магди Якуб ҳамда Вьетнам терма жамоаси билан АСЕАН давлатлари чемпионатида олтин медалларни қўлга киритган маҳоратли мураббий Парк Хуанг Сео “жамият ва маданият” йўналишида Осиёнинг энг яхшилари деб эътироф этилди.

Биз Twitterда