ФОТО: http://www.redcrescent.uz/
ОТАЖОНЛАРИМ
Отамни кўрган Сиз – отажонларим,
Қалбимга яқиним, қадрдонларим,
Насллар томирида оқар қонларим,
Ягона тилагим – омон, бор бўлинг.
Сиз кўрган кулфатлар тарихдир бу кун,
Сиз чеккан заҳматлар қарийди секин.
Ва лек сиз қариманг, қариманг лекин,
Ягона тилагим – омон, бор бўлинг.
Кездим қанча юртлар, изларингиз бор,
Ғолиблик ярашган юзларингиз бор.
Ақлнинг кўзи – Сиз, сўзларингиз бор,
Ягона тилагим – омон, бор бўлинг.
Фашистни титратган паҳлавонимсиз,
Темурдек енгилмас қаҳрамонимсиз.
Оримсиз, номусим, шавкат-шонимсиз,
Ягона тилагим – омон, бор бўлинг.
******
ҚАБРЛАР
Украина – бепоён ўлка,
Қишлоқ, ўрмон, яйловлари кўп,
Ҳаммасида қалбни ўртовчи,
Катта-кичик қабрлар тўп-тўп.
Йўл четида мунғайган тепа,
Қай миллатнинг алп ўғлони.
Ҳатто қудуқ боши – сайҳонда,
Марҳумларнинг қабр-қўрғони.
Қайинзорлар ичра йўл солиб,
Қадам боссам, қалбим бўзлайди.
Чўкиб қолган ҳар лаҳад, ё Раб,
Машъум уруш нархин сўзлайди.
Барча қабр тепасида ҳам,
Кўз ёш ила маҳзун қоламан.
Балким уруш ютган у тоғам...
Аламимдан йиғлаб оламан.
Яна қабр, яна қабристон,
Урушларга ўқийман лаънат.
Қабр билан бошлаган сайҳон
Қабр билан тугади ҳайҳот!
Украина – бепоён ўлка,
Қишлоқ, ўрмон, яйловлари кўп,
Ҳаммасида қалбни ўртовчи,
Катта-кичик қабрлар тўп-тўп.
Равшанбек Мирзаолимов