Наманган тумани Туркия сармояси учун жозибадор ҳудудга айланмоқда

 
Наманган туманининг географик жойлашуви, яъни Наманган шаҳрининг шундоқ биқинида жойлашгани туман ҳудудига хорижий сармоядорларни тортишни бироз қийинлаштиради. Сабаби, инфратузилма нуқтаи назаридан Наманган шаҳри тумандан анча илгарилаб кетганидир. Бироқ Наманган туман ҳокимиятининг сайъ-ҳаракатлари, сармоядорларнинг ҳар бир хоҳиш-истагини амалга ошириб беришни ўзларига устувор вазифа қилиб белгилаб олганликлари сабабли, туман ҳудудида ҳар ойда хориж сармояси иштирокида янги корхона очилмоқда, ташкил этиш юзасидан шартномаси тузилмоқда, ишлаб чиқариш учун қурилиш жараёни йўлга қўйилмоқда.
Тумандаги “Ижодкор” ММТП ҳудудидаги “Орзу” массивидаги фойдаланилмаётган 7 гектардан ошиқ ер майдони 16 та тадбиркорлик субъектига ажратиб берилганига кўп бўлгани йўқ. Бугун бу ерда ташкил этилган “Янги ҳаёт” кичик саноат зонасида иш қизғин. Бу ерда яратилган имкониятлар ҳамда шакллантирилган инфратузилмани кўриб, хорижлик сармоядорлар ҳам катта қизиқиш билан “Янги ҳаёт”га ошиқишмоқда.
 
 
Туркиянинг Бурса шаҳрида жойлашган Doğan İpek компанияси ҳам, Наманган туманидаги доимий ҳамкорлари, “Келажак текстил савдо сервис” фирмаси билан биргаликда, бу саноат зонасида йирик ишлаб чиқариш лойиҳасини амалга оширмоқда. Трикотаж тармоғи учун бутловчи маҳсулотларни ишлаб чиқариш йўлга қўйиладиган бу янги корхона, жойий йилнинг сентябрь ойида фаолиятини бошлайди. Турк сармоядорларнинг 500 минг долларлик тўғридан тўғри сармояси ҳамда “Келажак текстил савдо сервис”нинг ўз маблағлари ҳисобига бунёд этилаётган бу корхона, йиллик 1 миллиард 300 минг сўмлик маҳсулот ишлаб чиқаради, 80-100 минг АҚШ доллари қийматида хорижга йиллик экспорт кўзда тутилмоқда. Янги корхона 50 дан зиёд ёш мутахассисга ўз эшикларини очади.
 
 
Наманган тумани ҳокимлиги томонидан ажратилган 0,95 гектарлик майдонда қурилиш ишлари қизғин кетмоқда. Биринчи лойиҳанинг ортидан иккинчисининг ҳам тамал тоши аллақачон қўйиб бўлинди. Бугунги кунда костюм-шим ишлаб чиқаришда ҳамда бу тармоқнинг замонавий жиҳозланиши ҳамда ишлаб чиқариш салоҳияти нуқтаи назаридан Туркия ва Вьетнам қаторида бугун жаҳоннинг илк уч давлати қаторида эътироф этилаётган Ўзбекистондаги корхоналарнинг талабини эътиборга олган ҳолда, костюмлар учун елка таглиги ишлаб чиқариш учун ҳам бино қурилиши жадал олиб борилмоқда. Бир миллион доллардан ортиқ қўшимча сармоя олиб келадиган бу лойиҳа, мамлакатимиз текстил тармоғининг ривожига ҳисса қўшиши табиий.

Биз Twitterда