Наманганлик армрестлингчилар жаҳон чемпионатида 3 та олтин медални қўлга киритишди

 
2019 йил 26 октябрь - 4 ноябрь кунлари Руминиянинг Констанца шаҳрида бўлиб ўтаётган ўсмирлар ва катталар ўртасида армрестлинг бўйича 41-Жаҳон чемпионатида иштирок этган Наманган вилояти вакиллари учта олтин медални қўлга киритишди.
 
 
Поп тумани вакили Назокат Солиева чемпионатда иккита олтин медални қўлга киритди. Ўсмир қизлар ўртасида 60 кг вазнда иштирок этган Назокат Солиева, дастлаб чап қўл беллашувлари финалида россиялик Екатерина Прусакова устидан ғалаба қозониб, биринчи бўлган бўлса, кейинчалик ўнг қўл беллашувлари финалида ҳам айни рақибни енгиб ҳар икки қўлда жаҳонда тенгсиз эканини исботлади.
 
 
Ўсмирлар ўртасида 65 кг вазнда иштирок этган косонсойлик Саидмуҳаммадхон Аҳмадхонов ҳам ўнг қўл беллашувларида муваффақиятли иштирок этиб жаҳон чемпионати олтин медали соҳибига айланди. Финал учрашувида рақиб грузиялик Гулади Букианинг қўли баланд келди, бироқ финал баҳсидан кейин бу спортчининг допингдан фойдалангани аниқланиб, ғолиблик асл кучли бўлган Саидмуҳаммадхонга берилди.
Бу спортчиларимизнинг жаҳон чемпионатидаги илк ғалабалари эмас. Назокат 2017 йилда Венгрия пойтахти Будапештда ўтказилган жаҳон чемпионатида, Саидмуҳаммадхон эса ўтган йили Туркиянинг Анталья шаҳрида ўтказилган жаҳон чемпионатида ҳам зафар қучишганди.

Биз Twitterда