Vodiymedia’нинг ўз манбаларидан олган хабарига кўра, Наманган шаҳар ҳокими Шавкат Абдураззоқов бошчилигида катта делегация, июнь ойининг бошларида гулдан саноат маҳсулотлари ишлаб чиқариш ва уни туризм саноати даражасига кўтариш тажрибасини ўрганиш учун Туркиянинг Испарта шаҳрига йўл олишади.
Ўзбекистон Республикаси Туризмни ривожлантириш давлат қўмитаси раиси Азиз Абдуҳакимовнинг маслаҳатчиси лавозимига тайинлангандан сўнг республикамизнинг туризм салоҳиятини ўрганиш учун вилоятларни айланган Туркиялик Содиқ Бадак, 2017 йил 20 декабрда Наманганда бўлганди.
Вилоят ва шаҳар ҳокимлиги вакиллари, туризм сектори субъектлари ҳамда меҳмонхоналар раҳбарлари иштирокида ўтказилган учрашувда, Наманганнинг “Гуллар шаҳри” туризм тадбирлари ҳақида ҳам сўз борганди. 57 йиллик тарихга эга “Гул байрами” тадбирлари ҳамда Намангандаги гулчилик ривожи ҳақида маълумотларни қизиқиш билан тинглаган жаноб Бадак, бу борадаги ишларни янада ривожлантириш кераклиги, фақат гул билан чегараланиб қолмасдан, гулдан турли косметика маҳсулотлари ишлаб чиқаришни йўлга қўйишни, “Гуллар шаҳри” бренди билан жалб этилган туристларга бундай маҳсулотларни ҳавола этиш зарурлигини таъкидлаб ўтганди. Туркиянинг Испарта шаҳри атиргуллари билан дунёга машҳурлигини эслатиб ўтган Содиқ Бадак, у ерда айнан атиргуллардан ишлаб чиқарилган косметика маҳсулотлари саноати кенг ривожланганини айтиб, Наманган учун Испарта тажрибасини ўрганиш муҳим бўлишини қайд этганди.
