Наманганда халқаро теннис турнири якунланди

 
Наманган шаҳридаги Спорт ўйинлари ва енгил атлетикага ихтисослаштирилган болалар-ўсмирлар спорт мактаби кортларида Халқаро теннис федерацияси (ITF) таснифига кирувчи ўсмирлар ўртасидаги XXI анъанавий халқаро турнир ўтказилди.
Бир ҳафта давом этган ушбу мусобақада мамлакатимиздан ташқари, Қирғизистон, Қозоғистон, Росссия, Украина, Белорусь, Латвия, Болгария, Кипр, Сербия, Арманистон, Словакия, Чехия, Руминия, Буюк Британия, Жанубий Африка Республикаси, Исроил, Сурия, Покистон, Таиланд, Ҳиндистон давлатларидан келган юздан зиёд ёш ракетка усталари ғолиблик ва  ITF рейтинг очколарини олиш учун кортга чиқдилар.
Нуфузли турнирнинг саралаш баҳсларида ва асосий қисмида Азиз Дадабоев, Олимжон Набиев, Азамат Луқмонов, Мирвали Муҳаммаджонов, Ҳумоюн Абдумаликов, Сергей Фомин, Темур Сатимов, Юлия Ким, Лайло Баҳодирова, Камола Умарова, Мумтоза Мамадалиева, Зебо Адашева, Элина Шарипова каби умидли спортчиларимиз гарчи ҳал қилувчи босқичга етиб кела олмаган бўлишса-да, дунё рейтингининг кучли юзталигида бораётган номдор рақиблари билан ўйинларда катта тажриба тўплашди.
Мусобақанинг якуний натижаларига тўхталадиган бўлсак, ўғил болалар ўртасидаги якка тартибдаги баҳсларда турнирнинг биринчи рақамли ракеткачиси, кипрлик Менелаосу Эфстатиу бош совринни қўлга киритди. У финалда Белорусь спортчиси Александр Леоненкони 6:2, 6:3 ҳисобида мағлубиятга учратди.
Яккалик беллашувларида омади чопмаган Александр Леоненко жуфтликда ғалаба нашидасини сурди. У юртдоши Александр Згировский билан “дуэт” ҳосил қилиб, ҳал этувчи ўйинда Россиядан ташриф буюрган Сергей Болотев – Руслан Мугтасимов тандемини 6:4, 3:6, 10:8 ҳисобида доғда қолдирдилар. Эътиборлиси шундаки, белоруслик теннисчилар қаторасига иккинчи маротаба Наманган кортларида ғолиблик шоҳсупасининг энг юқори чўққисига кўтарилишди.
Қизлар иштирокидаги мусобақанинг финал учрашувида украиналик Дарья Снигурни 7:5, 6:2 ҳисобида таслим этган рус ракетка устаси Екатерина Вишневская бош совринга эга чиқди. Жуфтлик баҳсларида эса зафар сурури Романа Циловска (Словакия) – Зозия Кардава (Россия) “дуэти”га насиб қилди. Улар қозоғистонлик қизлар Дарья Детковская ва Екатерина Дмитриченкодан иборат жуфтликдан уч сет натижасига кўра (6:7, 6:1, 10:3) ҳисобида устун келишди.
Халқаро турнирнинг тантанали тақдирлаш маросимида совринли ўринларни эгаллаган умидли спортчилар республика Жисмоний тарбия ва спорт давлат қўмитаси, Ўзбекистон теннис федерацияси, Наманган вилояти ҳокимлиги томонидан қимматбаҳо эсдалик совғалар билан тақдирландилар.
Оқилхон ДАДАБОЕВ

Биз Twitterда