Мирзиёев Америка-Ўзбекистон савдо палатаси раисини қабул қилди

Article
Ўзбекистон Республикаси Президенти Шавкат Мирзиёев 1 февраль куни Америка-Ўзбекистон савдо палатаси раиси Кэролин Лэммни қабул қилди. Бу ҳақда ЎзА хабар берди.
Давлатимиз раҳбари учрашув чоғида етакчи Америка компаниялари вакилларидан иборат делегациянинг ташрифи ҳамда қўшма бизнес-форумнинг ўтказилиши Ўзбекистон ва АҚШ ўртасидаги икки томонлама савдо-иқтисодий ва инвестицион ҳамкорликни ривожлантиришга бўлган ҳар иккала тараф интилишининг исботи эканини таъкидлади.
1993 йили ташкил этилган Америка-Ўзбекистон савдо палатаси икки мамлакат ўртасидаги савдо-сармоявий алоқаларни ривожлантириш йўлидаги асосий механизмдир.
АҚШнинг «Boeing», «General Motors», «General Electric», «CNH Industrial», «Hyatt», «Hilton» каби кўплаб компаниялари Ўзбекистонда ўз тижорий фаолиятларини кенг амалга ошириб келишмоқда.
Президентимизнинг Америка-Ўзбекистон савдо палатаси раиси билан учрашуви чоғида  савдо-иқтисодий, инвестицион, технология, инновация ва таълим соҳаларида узоқ муддатли ва кенг қамровли ҳамкорликни янада ривожлантириш ҳақида сўз борди.
Президентимизга илиқ қабул учун самимий ташаккур изҳор қилган Лэмм қўшма палата аъзолари –Америка компаниялари номидан муваффақиятли раҳбарлиги, мамлакатда ислоҳотларнинг амалга оширилиши ҳамда чет эл инвестицияларини жалб этишдаги катта ҳиссаси учун Шавкат Мирзиёевга ўз миннатдорчиликларини изҳор қилди.

Биз Twitterда