Эй “Озодлик” деган “ахборот” нашрининг муассислари, хўжайинлари, раҳнамолари, ҳомийлари ва яна билмам кимлари!
Очиғи, “Озодлик”ни юритиш билан нимага эришмоқчисизлар, нима мақсадларни кўзлагансизлар, ҳаммага аён. Сизлар олиб бораётган бундай “фаолият” бир тийинга қиммат эканини ўзларинг ҳам мендан яхши тушунасизлар! Тўртта-бешта туз еб, тузлуғига тупурувчи, ёки бўлмаса ўзбек бўлиб, ўзбеклигини беш қурушга сотишга шай бўлган қоғоз қораловчининг ёзган уйдирма ва бўҳтонлари билан сиз ёзган хабар эътибор тортиб қолмайди, сизнинг сафсатангиз ҳақиқат сифатида қабул қилинмайди. Лекин... кўчада ит ҳураверса, уйда ўтирган инсоннинг ғаши келиб, кўппакни жим қилишни, ҳайдаб солишни истагандай, сизнинг “Озодлик”даги муттасил беъмани чиқишлар шунақа ғаш келтиряпти.
АҚШнинг махсус хизматлари томонидан молиялаштириб келинган, кейинроқ бу молиялаштириш манбаси АҚШ конгресси этиб кўрсатилиб келаётган (Али хўжа, хўжа Али) бу “Озодлик” нашрингиз қайси ўлкалар НАТОга қўшилса, ёки АҚШ қўшинлари бостириб кирса, ана ундан кейин ўша ўлкаларни ўз диққат марказидан чиқариб келмоқда. Иккисини ҳам Ўзбекистонда бўлмаслигини эътиборга олганда, ҳали ўзбекчада анча йиллар иш олиб боришни режа қилаётганингиз тайин.
“Озодлик” нашрингиз янги материал берибди Наманганимиз ҳақида. “Бир ой ичида Наманганда безориликда айбланган 50 нафар коллеж ўқувчиси тергалди” деб номланган. Очиғи, ҳар доимгидан ҳам қуруқ, бетайин материал, эшитган икки оғиз гапни кўпиртириш мақсадида фактларни аралаштириб, кўпиртириб, ўзларича шов-шув ясашмоқчи бўлишибди шоввозлар! Энг қизиғи, материални ёзган шахс билан кўчадан маълумот йиққан бошқа бошқа бўлгани кўриниб турибдики, қовушмаган жумлалар одамнинг энсасини қотиради.
Энг қизиғи шуки, мактабларда (коллеж эмас, ўрта мактабларда!) ўқувчилар милтиқ кўтариб келиб, синфдошларини ўққа тутадиган, ўқитувчилар ўз ўқувчиларини жинсий яқинликка жалб этадиган, зўравонлик ҳамда ирқпарастлик авж олган, йилига 100 мингга яқин ўқувчи бир-бирига тан жароҳати етказадиган, мингларча ўсмир қилган жинояти учун умрбод қамоқ жазосига маҳкум қилинган АҚШнинг конгресси томонидан молиялаштирилаётган “Озодлик” Наманганда икки ўқувчи ўртасида муштлашув бўлибди деб, сенсация яратишга уринса кулгили чиқаркан!
Материални ўқиб чиқиб, янада ҳайрон қолдим бироз: Наманган вилоят ҳокимлигидаги таълим-тарбия ишларига маъсул мулозимни, вилоят прокуратураси ходимини рўкач қилаётган муаллифлар бераётган маълумотлар қай даражада бўрттирилган, аслида ҳолат қанақа деган журналистик қизиқиш пайдо бўлди.
Наманган вилояти Ички ишлар бошқармаси Ҳуқуқбузарликларнинг олдини олиш бошқармаси бошлиғи Рустам Дўстматовга боғланиб, масалага ойдинлик киритиб беришни сўрадим.
- “Шаҳарда бир ой ичида 50дан ошиқ коллеж ўқувчиси безорилик, зўравонлик ва талончиликда айбланиб, уларнинг ота-оналари маъмурий жавобгарликка тортилган” деган гап уйдирмадан бошқа нарса эмас –, деди ИИВ маъсули. – сабаби, вилоят бўйича мавжуд жами коллежлар ўқувчилари томонидан содир этилган жиноятлар сони йил бошидан бери бор-йўғи 33 та. Қолаверса, келтирилган фактлар ҳам кўчада “маршрутка”даги хотинларнинг гапига ўхшаб кетибди.
Аниқ маълумот келтирсак, вилоятда 108 та касб-ҳунар коллежи ва 10 та академик лицей мавжуд бўлиб, 113778 та ўқувчи таълим олади. Юқорида айтганимдай, йил бошидан бу кунга қадар улар томонидан содир этилган жиноятлар сони 33! Наманган шаҳрининг ўзида бир ойда 50 та жиноят содир этилган деган тўқима фактни қаердан олишган, бизга қоронғу.
“Наманган алоқа-транспорт коллежининг икки нафар талабаси устидан жиноий иш очилди. Улар маҳалладаги компютер хонасидан битта нотбук ўғирлашган” деган маълумот ҳам қаердандир эшитиб қолган гапни хабарга айлантиришга уриниш холос. Ҳа, Намангандаги бир коллеж, аниқроғи, енгил-саноат коллежи талабаси озиқ-овқат дўконидан нархи 1.200.000 сўмлик ноутбук компьютерини ўғирлаб кетганлиги аниқланган. Ҳозирда тергов ишлари олиб борилмоқда. Энди қаранг, бу хорижий “ҳамкасабаларингиз” материалига, ўғирлик қилганлар сони иккита эмиш, алоқа-транспорт коллежида ўқирмиш, улар милисага ишга кириш учун пул тўплаëтгандик, деб айтишганмиш!” Ғирт уйдирмалигини қаранг!
“Наманган тиббиëт коллежи кунора жанжалларга саҳна бўлмоқда” деб берилибди. Тиббиёт коллежида қуйидаги ҳолат содир бўлган: биринчи босқич ўқувчиси йигит гуруҳдош қиз билан ўзаро гап талашиб қолган, сўнг ўқувчи қиз акасини коллежга бошлаб келган, синглисини ҳимоя қилган ака ўқувчи йигитни уриб чап юз қисмига тан жароҳати етказган. Мазкур ҳолат юзасидан Наманган шаҳар ИИБ Тергов бўлими томонидан суриштирув ҳаракатлари олиб борилиб, жабрланувчи ўзини урган шахсга нисбатан қонуний чора кўришни сўраб ариза ёзмаганлиги сабабли Ўзбекистон Республикаси ЖПКга асосан жиноят иши қўзғатишни рад этиш ҳақида қарор қабул қилинган.
Лоладаги лицейга келсак, ўтган йили Наманган давлат университети қошидаги 1-академик лицейнинг ўқув биносида биринчи босқич ўқувчиси 2 та иккинчи босқич ўқувчиси билан жанжаллашиб қолган, бир-бирларини суриб ташлашганда А.Хусниддинов боши билан ўткир қирғоққа урилиб, ҳаёт учун хавфли бўлган оғир тан жароҳати олган ва касалхонада вафот этган.
Ушбу ҳолат бўйича айбдор топилган иккинчи босқич талабаларидан бирига 5 йил 6 ой, иккинчиси 5 йил муддатга озодликдан маҳрум этиш жазоси тайинланган.
Бу Наманган вилояти ИИБ Ҳуқуқбузарликларнинг олдини олиш бошқармаси бошлиғининг сўзлари. “Озодлик” материалида кўтаришга уринилган “шов-шув” ўрнига аниқ фактлар, расмий маълумотлар.
Энди, яна юзлансак “Озодлик” раҳнамоларига: бу иккили стандартлар ўйини қачон тугайди?! Қачонгача ўзингизнинг уйингизда бўлаётган ҳолатларни хусусийлик билан баҳолаб, бошқа ўлкалардаги хусусий ҳолатларни умумийликка айлантиришга давом этади бу қарамоғингиздаги нашр?
113778 та ўқувчи салкам олти ойда 33 та жиноят содир этибди. Сиз севадиган фоизли статистикага айлантирсак, ҳар уч ярим мингдан бир ўқувчига тенг бўлади. Расмий статистик маълумотларга кўра, АҚШда 2015 йилда 921600 марта 18 ёшдан кичик фуқароларни ҳибсга олинганини кўриш мумкин. Ярим йил учун ярмини 460800 деб олайлик. Бу ҳолатда яна расмий статистикада келтирилган 323 миллиондан ортиқ АҚШ фуқаросининг 22,8 фоизи (73,6 миллиони) 18 ёшдан кичик эканини эътиборга олсак, мамлакатингизда ҳар 160 дан бир ёш йигит-қиз жиноят қилаётганини кўришимиз мумкин. Хўш, ким кимга “морал” ўқиши керак!??
АҚШда жиноятчи болаларни катталар билан бир қаторда суд қилиниши, жазони бирликда ўташини эслатиш шарт бўлмаса керак?!!
“Озодлик” нашрингиз олиб бораётган фаолиятни ўзбекчада “Иштони йўқнинг тиззаси йиртиққа кулиши” дейилади. Кўп масхара бўлмасдан, йиғиштирсанглар бўларди бу циркни!
Дилмурод Жумабоев
