Иштони йўқнинг тиззаси йиртиққа кулиши ёхуд Наманган матбуотини танқид қилиш писта ўраладиган "Ҳуррият"га қолдими?

 
"Ҳуррият" газетаси, 2018 йил 18 апрель сонида “Наманган вилояти матбуоти "Ҳуррият" газетаси нигоҳида: таҳририятлардаги кўҳна аксиома ёки эски ҳаммом, эски тосдан қачон ва қандай қутуламиз?” деган мақола эълон қилибди. Бу газета таҳририятидан ташқари биров таниб-танимайдиган Холида Файзиева деган журналист имзоси остида.
Жуда тантанавор бошланибди мақола: “Газетхонга маълумки, “Ҳуррият” – Ўзбекистон Журналистлари ижодий уюшмаси нашри сифатида вилоят ва туманлар газеталари шарҳини йўлга қўйган эди. Бундан мақсад – бир-биримизга кўзгу бўлиш, камчиликларни бартараф этиб, муштарийлар қўлига сифатли маҳсулот етказиб бериш, оммани газетхонликка чорлашдан иборат...
Афсуски “чумчуқ сўйса ҳам қассоб сўйсин” мақолини унутган муаллиф, сарлавҳанинг ўзидаёқ таҳлил қўлидан келмаслигини кўрсатиб қўйган. Бир-икки газетадаги лупа билан топган техник хатоларини бутун Наманган матбуотининг баҳоси сифатида беришга уринган. Бу билан мақола таҳлилийликдан чиқиб, “заказ” материал тусини олган. Аслида ҳам шунақами, буни энди муаллиф билади.
Хуршид Дўстмуҳаммад бош муҳаррирлик қилган, бутун Ўзбекистон севиб ўқиган даврдаги ҳолати билан солиштирганда бугун писта ўрашдан бошқага деярли ярамай қолган деса, деярли эътироз бўлмайдиган нашр – “Ҳуррият” газетасида бундай юзаки материалнинг чоп этилиши, Наманган вилоятида бугунгача паст савияли материаллари сабаб деярли ўз ўқувчисини йўқотган бу газета, ушбу бирёқлама “мақсадли” материал туфайли энди умуман Наманган учун бегонага айланади десак адашмасак керак.
“Шаклда оқсаш, яъни масъул котиб ва дизайнерларга тегишли хатолар ҳамон барҳам топмаяпти, аксариятида учрайдиган камчилик матнларнинг нотўғри жойлаштирилиши бўлиб қолаётир” деб бутун бошли вилоят матбуотига баҳо бераётган нашрга қарата Сийратни эмас, Суратни таҳлил қилишни ўрганинг, ҳайф сизга Ўзбекистон Журналистлари ижодий уюшмаси нашри деган мақом дегингиз келади.
Журналистнинг юзаки ёндашуви унинг савияси билан боғлиқ, майли. Аммо таҳририятда ўтирган калласи катталар буни нима мақсадда чоп этди экан? Шу ҳам гап бўлдими: ...Сарлавҳалар учун танланган шрифтлар ҳам қониқарсиз... (худди бирор жойда қониқарлиси шунақа бўлиши керак деган қонуният бордай!), ... Ёнма-ён турган икки мақола бири ўта сиқиқ, бири эркин бўлиши мумкинми?!... (Ким айтди сизга мумкинмас деб, яна ундов ҳам қўйиб қўйибди, худди қонунга зид ишни таъкидлагандек!)
Энг қизиғи, сарлавҳани ўқиб Наманган матбуоти эскилик ичра қолибди деган фикр уйғонса, мақоланинг ярмидан кўпи бир-иккита нашрнинг пиар рекламасига айланганини ўқиб, ҳа, тушундик дегандай бўласиз...
Яна бир ҳолат шуки, заҳматкаш журналистимиз жон куйдириб "танқид қилган", бироқ танқид эмас, мақташ керак бўлган бир жиҳат бор: баъзи нашрларга танқид қиличини аёвсиз яланғочлаган муаллиф, материалларнинг кўпи бошқа манбадан олинганини, тагида манбаси кўрсатилганини айтяпти. Ия, бугун Ўзбекистонда муаллифлик ҳуқуқи умуман эътиборсиз қолаётган бир пайтда, ҳаттоки давлатнинг катта-катта расмий нашрлари ҳам бошқасининг материалини сал ўзгартириб, манбасини кўрсатмасдан ўз материали сифатида ҳавола қилаётган, ахборот ўғрилиги қилаётган бир пайтда, бунақа қонуний ёндашувни ўрнак қилиб кўрсатиш керак эмасми...?
Аслида масаланинг яна бир жиҳати бор. Бировни танқид қилишга маънавий ҳуқуқ бўлиш керак танқидчида. Ўзи "Ҳуррият" бугунга қадар қайси ижтимоий-сиёсий муаммони кескин кўтариб чиқди жамиятга? Қайси масала, "Ҳуррият" нашри сабабли ўз ечимини топиб инсонлар ҳаётини ўзгартирди? Kun.uz каби интернет нашрининг бир соатда берган материалларининг, бизнинг Vodiymedia.uz кабиларнинг бир ҳафтада берган материалларининг ижтимоий аҳамияти, "Ҳуррият"нинг бир йиллик ишидан кўп десак, ҳеч ким ажабланмаса керак. Бировни танқид қилишда аввал ўзига бир баҳо бериш керак. Акс ҳолда ўқувчининг берадиган баҳоси аниқ бўлади: Иштони йўқ тиззаси йиртиққа кулибди!
Дилмурод Жумабоев

Биз Twitterда