2017 йил 1 февраль куни Ўзбекистон шахмат федерациясининг навбатдан ташқари конференцияси бўлиб ўтди деб хабар қилади uzchess.uz.
Тадбирда Ўзбекистон Халқ таълими вазири Улуғбек Иноятов, Маданият ва спорт ишлари вазирининг биринчи ўринбосари Муроджон Алиев, «Ўзпахтасаноатэкспорт» холдинг компанияси бошқарув кенгаши раиси Акмал Камолов, Миллий олимпия қўмитаси бош котиби Ойбек Қосимов, федерация президиуми аъзолари ҳамда федерациясининг ҳудудий бўлинмаларидан 17 нафар вакил иштирок этишди.
Иштирокчилар Миллий олимпия қўмитаси президенти лавозимига ишга ўтган аввалги федерация раҳбари Алишер Султоновга янги иш ўрнида муваффақиятлар тилашди.
Конференцияда шахмат федерациясига янги президент сайланди. Ўзбекистон Халқ таълими вазири Улуғбек Иноятов бир вақтнинг ўзида Ўзбекистон шахмат федерацияси президенти вазифасида иш олиб борадиган бўлди.
Ҳусан Турдиалиев шахмат федерациясининг биринчи вице-президенти ҳамда FIDE делегати бўлди, Акмал Камолов, Баҳодир Умурзоқов, Элдор Ғофуров, Турсунали Қўзиев ва Рустам Қосимжоновлар вице-президент лавозимини эгалладилар. Ташкилот бош котиби вазифаси Хуршидабону Холиқовага тегди.
